Герасимовски: Полицијата, а не ПОЦ, одбивала да го подигне возилото

 

Во однос на видеото коешто се шири по социјалните мрежи, градоначалникот Горан Герасимовски истакнува дека се крајно некоректни и манипулативни обидите од некои медиуми да се префрли одговорноста на Пајак службата на ЈП „Паркинзи на Општина Центар“ која професионално си ја врши работата.

„Отстранувањето на непрописно паркираните возила е по налог на службено овластено лице. Во случајов нашите вработени воопшто не го стопираат кревањето, туку едноставно чекаат налог од страна на службеното лице, полицаец. По добивање на истиот веднаш постапуваат и го креваат возилото. Тоа впрочем и го објаснува службеникот од ПОЦ во самото видео. 

 

Благодарност до екипите на ПОЦ кои неуморно работат на санкционирање на несовесни возачи. Ја поздравувам и активноста на граѓаните кои бараат санкционирање на сите оние коишто со своите возила ги блокираат улиците и велосипедските патеки во Центар. 

 

Истовремено, недозволиво е полициски службеник да не сака да си ја врши својата работа. Барам од МВР да ги санкционира полициските службеници кои не постапуваат при очигледни прекршоци. Недозволива е селективноста при казнување на граѓаните“, потенцира Герасимовски. 

 

Од МВР пак тврдат дека возилото не е на полициски службеник.

„Настанот за кој прашувате се случил на 22.03.2025. Возилото е подигнато од страна на ПОЦ и од страна на СВР Скопје издаден е платен налог. Исто така ве информираме дека предметното возилото не е на полициски службеник“, велат од МВР.