Фон дер Лајен го преживеа гласањето за недоверба, но тоа е нејзината „последна шанса“
Претседателката на Европската комисија го победи планот на крајната десница да ја собори
Урсула фон дер Лајен во четвртокот преживеа гласање за недоверба на нејзиното раководењео со Европската комисија.
Мнозинството членови на Европскиот парламент, кои гласаа за предлог поднесен од екстремната десница, ја поддржаа претседателката на Комисијата. Доколку таа го изгубеше гласањето, Фон дер Лајен и остатокот од нејзината Комисија ќе мораа да се повлечат, фрлајќи ја ЕУ во хаос.
Сепак, потпретседателката на Парламентот, Катарина Барли, од социјалистите и демократите, рече дека многу европратеници се решени дека ова ќе биде „апсолутна последна шанса“ за Фон дер Лајен.
360 европратеници гласаа против предлогот, а 175 беа „за“ и 18 се воздржаа. Од 720 европратеници, 553 се појавија да гласаат. На предлогот ќе му беа потребни 360 гласови за да помине.
И покрај тоа што имаше поддршка од нејзината Европска народна партија, како и од социјалистите, либералите од Обнова и Зелените, многу европратеници од овие групи не се појавија да гласаат.
Иако Фон дер Лајен, како што се очекуваше, живее за да се бори за уште еден ден, нејзините проблеми се далеку од завршени. Гласањето – првиот таков обид за недоверба од 2014 година – го разоткрива зголеменото политичко противење на претседателката на Комисијата, која, како и поголемиот дел од Европа, се чини дека се свртила кон десно, ставајќи ја во конфликт со две од главните партии што ја доведоа на власт.
Фон дер Лајен можеби преживеа, но политичките семејства од целиот спектар ја искористија постапката за да ги искажат своите поплаки против Комисијата, без разлика дали станува збор за транспарентност и прекумерна централизација на моќта, повлекување од Зелениот договор или обвинувања за кршење на институционалните процедури на ЕУ.
Исто така, ова ја потресе коалицијата на партии што го поддржуваат вториот мандат на Фон дер Лајен, при што социјалистите и либералите сѐ повеќе се во конфликт со претседателката на Комисијата.
Во периодот пред гласањето, обете групи се заканија дека ќе се воздржат од гласање поради нивната загриженост дека Комисијата се свртува кон десно.
Сепак, либералите се повлекоа, велејќи дека не сакаат да учествуваат во „игрите“ на екстремната десница со стабилноста на Европа, според портпаролот на Обнова.
Социјалистите го следеа примерот во четврток вечерта откако обезбедија отстапка од Фон дер Лајен за долгорочниот буџет на ЕУ, кој Комисијата треба да го презентира следната недела.
Претседателката на Комисијата ѝ вети на централно-левичарската партија дека ќе го задржи Европскиот социјален фонд, кој е наменет за справување со сиромаштијата и поддршка на ранливите групи, како дел од буџетот, и покрај претходните индикации дека ќе биде отфрлен.
Георге Пипереа, романски пратеник од десничарската група Европски конзервативци и реформисти (ЕЦР), кој го поднесе предлогот против Фон дер Лајен, за „Политико“ изјави дека очекува предлогот да пропадне, но дека вежбата е здрава за ЕУ. Тој додаде дека очекува овој потег да „ја отвори Пандорината кутија“ покажувајќи дека „е можно“ да се оспори претседателот на Комисијата.
Фон дер Лајен треба да се подготви за уште „неколку“ обиди за недоверба, рече Пипереа.
ЕПП не се согласува. „Денот кога ќе се вратиме од одмор, речиси ќе заборавиме на ова“, предвиде потпретседателот на ЕПП, Зигфрид Мурешан.
. „ЕПП денес повторно покажа дека ние сме фактор на стабилност за проектот на ЕУ“, рече шефот на групата Манфред Вебер по гласањето.
Самата претседателка на Комисијата не беше присутна на гласањето, бидејќи беше во Рим каде што присуствуваше на конференција за обнова на Украина.
Сепак, во објава на Икс, таа рече: „Додека надворешните сили се обидуваат да нè дестабилизираат и поделат, наша должност е да одговориме во согласност со нашите вредности. Ви благодарам и да живее Европа“.
Набљудувачите го следеа прашањето дали Комисијата на Фон дер Лајен ќе добие поголема или помала поддршка отколку што доби кога европратениците ја избраа во ноември 2024 година.
„Би ѝ препорачала на претседателката на Комисијата да не мисли дека тие бројки се утешни затоа што има многу луѓе кои не гласаат за ова затоа што тоа е крајно десничарски предлог за недоверба“, предупреди Бас Ајкоут, копретседател на групата на Зелените, кој гласаше против предлогот.