Филмови од балканските земји може да се видат во Тетово

На јубилејното 10-то издание на меѓународниот филмски фестивал ТИФФ ОДА во Тетово повторно ја има категоријата „Сине Балкан панорама“, а ќе бидат прикажани филмови создадени во земјите од балканскиот регион со пет премиери. Фестивалот во Центарот за култура „Иљо Антески-Смок“ вечер започнува со свечено отворање во 20 часот и прва проекција половина час подоцна.

-Филмовите во категоријата „Сине Балкан панорама“ се:  „HIVE“ филм кој се истакна и беше оценет на многу меѓународни фестивали, продукција од Косово, Албанија и Северна Македонија, во режија на Блерта Башоли; „101 претстава и 102 животи, Бајруш Мјаку“ од режисерот Филип Херин создаден во Северна Македонија; „Андромеда Галакси“ е од Косово во соработка со Шпанија, Италија и Северна Македонија од режисерот Море Рача; „Помирување“ производ на Словенија, Србија, Црна Гора и Косово од режисерката Марија Зидар; „Човек“ на режисерот Игор Иванов од Северна Македонија, Србија, Бугарија, Словенија и Косово, информира Берат Асани, претседателот на меѓународниот филмски фестивал.

На годинашниот филмски фестивал ќе се прикажат вкупно 40 филмови, од кои 13 краткометражни играни филмови, 8 кратки документарни филмови, 7 анимирани кратки филмови и 12 студентски филмови.

„Исчезнатиот“ на Арбен Тачи е филм со кој вечерва ќе започне јубилејното издание на филмскиот фестивал.