Филипче ќе побара средба со Мицкоски, целта е државата да се ослободи од „канџите“ на политиката
Филипче очекува Мицкоски да ја прифати средбата бидејќи прв „подал рака“
„Реакцијата на граѓаните е сосема оправдана, транзицијата и реформите не дадоа резултати, јавните сервиси не ги исполнија очекувањата на граѓаните“, рече Филипче пред да ги наведе областите на кои би се посветило вниманието на лидерската средба.
Како прво тој го посочи образованието кое според него е област која бара ефикасни системски решенија, затоа што, како што рече, државата нема веќе деца што треба да ги губи во странство.
Здравството е следниот приоритет на кој треба да се повети лидерската, затоа што, рече Филипче, не може само да посакуваме да бидеме здрави туку тоа мора да стане реалност и да го тргнеме од дневно-политичките пресметки, надмудрувања и математики.
Во правосудството, посочи Филипче, да се донесат во што пократок период реформите со широк консензус, а не само политички, односно со вклучување на фактори со сериозни капацитети во правосудната екпертиза.
Заслужувам да живееме во чиста животна средина, да дишеме чист воздух, а за огромните природни богатства мораме да најдеме начин да ги заштитиме, рече Филипче околу следната тема што ја предлага за лидерската средба, пред да ја посочи последната – партизацијата како проблем што најмногу ги иритира граѓаните.
„Да ги ослободиме институциите и системот од канџите на политика и партиите за младите луѓе да имаат компетитивен мерит систем и да веруваат во него, да се вработуваат и напредуваат со експертизата што поседуваат“, рече Филипче, на прес конференцијата на која ги образложи причините кои го поттикнаа да се организира лидерска средба за овие прашања.
Иако од ВМРО-ДПМНЕ оценија дека со барањето лидерска средба Филипче сака да си даде политичка тежина како лидер, премиерот Христијан Миоцкоски сепак не затвори врата за неговата понуда. Филипче денес најави дека и формално ќе побара средба со Мицкоски за да му ја пренесе лично иницијативата и темите за кои сака да се постигне заеднички консензус и заеднички да се изгради стратегија, а како прво да се договорат методите како да се одвива овој дијалог што според него не се случил досега во Македонија, во смисла дека партиите се вклучени во постојана конфронтација и не соработуваат ни околу основните национални прашања.
„Веќе е крајно време не само да зборуваме туку нешто и да направиме“, рече Филипче посочувајќи ја трагедијата во Кочани како настан кој ги покажа сите неуспеси на системот што го градевме досега.
„Ќе побарам средба со премиерот, а тој прв подаде рака и рече дека средбата е прифатлива. Првата средба може да биде тет-а-тет“, порача тој на прес конференцијата.
Тој тврдеше дека од настанот во Кочани и да сака СДСМ не може политички да профитира и дека од оваа криза сите треба да извлечеме поука и таа поука да ја имплементираме.
Запрашан од новинарите околу ставот за истрагата за пожарот во Кочани, Филипче повтори дека како партија им даваат максимална поддршка на институциите, но сметаат дека досега таа била селективна – бидејќи најголемата одговорност е во МВР каде што имале ингеренции а не презеле ништо, а тоа не се гледа кај приведувањата.
„ Доколку продолжи оваа тенденција ќе побараме формирање анкетна комисија“, навести Филипче негирајќи дека на некој начин СДСМ се повлекува околу оваа тема поради барањата да се истражат и претходните несреќи.
„Моментално даваме поддршка на истрагата на институциите и да видиме каде ќе води процесот. Треба таа да се прошири и да бидат опфатени други лица. Таа верига на настани, како што ја нарекува Владата, не може да се запре само со поранешните функционери“, порача Филипче. (С.Ј.)