Филипче демантира дека ќе се разговара за етнички прашања на лидерската средба

„Навистина ми е драго што премиерот веднаш го прифати состанокот, очекувам конструктивна средба“ – порача лидерот на СДСМ, Венко Филипче, пред средбата со премиерот и лидер на ВМРО-ДПМНЕ, Христијан Мицкоски закажана за 14 часот во зградата на Владата.Околу очекувањата од средбата тој сепак беше воздржан, порачувајќи дека е внимателен оптимист.

„Темите ги нафрлив вчера, денеска на премиерот ќе се обидам подетално да му ги објаснам, како и некои предлог-начини така како што е моето размислување во моментов, без претензија дека тоа е вистинскиот начин. Секако отворен сум за да разговараме за сите опции“, изјави Филипче.

Тој наедно ги демантираше обвинувањата на ДУИ дека денешната лидерска средба има моноетнички карактер. Состанокот, додаде тој, нема никаква етничка димензија.

„Повикот за лидерска меѓупартиска средба беше и сè уште е за сите партии. Со оглед на тоа што премиерот прв и веднаш прифати, еве ќе поразговараме за темите кои сметам дека треба заеднички да се менаџираат коишто никогаш на тој начин не биле така менаџирани. Мислам дека е навистина време да имаме поинаков пристап кон одредени важни прашања“,додаде Филипче.