Филипче: Аеродром е целосно запуштена и уништена општина поради ВМРО-ДПМНЕ,
Филипче го нарече Орце Ѓорѓиевски послушник на Мицкоски кој ќе работи според желбите на партискиот центар
ВМРО ДПМНЕ покажа дека нема план и капацитет за развој на државата ниту на централно, ниту на локално ниво, изјави претседателот на Социјалдемократскиот сојуз на Македонија, Венко Филипче, во општина Аеродром. Тој укажа дека е потребно ред, одговорност и работа за граѓаните, но и контрола на власта.
„Потребна е силна контрола на власта и локални тимови што испорачуваат – кандидати со интегритет и конкретни решенија, каква што е Каја Шукова во Скопје и д-р Александар Трајановски кандидат за градоначалник од СДСМ за општина Аеродром“,изјави Филипче.
Во изјавата тој посочи дека Трајановски е човек со интегритет, кој ги знае потребите на граѓаните, а неговата програма нуди решенија кои одговараат на потребите на жителите на Аеродром.
„Александар е единствениот вистински избор, човек со интегритет, чесен, работлив кој секогаш бил на висината на задачата што и да работел. Го познавам лично и знам дека оваа убава но за жал целосно запуштена општина ќе ја претвори во урбан и зелен рај како што заслужува да биде. Во изминатите четири години Аеродром беше целосно уништен од неспособниот Муцунски, а потоа и од наследникот кој не направи ништо. Жално е да се гледа колку е полно со смет, неискосени тревници и целосно уништена урбана опрема. Александар има програма која може да ја исполни и ќе ги реши клучните проблеми“, рече претседателот на СДСМ, Венко Филипче.
Тој исто така порача дека премиерот Мицкоски и ВМРО-ДПМНЕ го доведоа Скопје до пропаст и го оставија главниот град во државата да тоне во хаос.