ЕУ ја казни „Мета“ со 1,2 милијарди евра за злоупотреба на податоци од Фејсбук

Американскиот технолошки гигант „Мета“ е погоден со рекордна казна од 1,2 милијарди евра поради непочитување на правилата за приватност на ЕУ.

Ирската Комисија за заштита на податоците во понеделникот објави дека „Мета“ ја прекршила Општата регулатива за заштита на податоците (ГДПР) кога ги префрлила во Соединетите Држави низи лични податоци на европските корисници на Фејсбук, без доволно да ги заштити од практиките за следење на податоците на Вашингтон.

Тоа е најголемата казна наметната според водечкиот закон на блокот за заштита на приватноста (ГДПР) и доаѓа во пресрет на петгодишнината од спроведувањето на законот на 25 мај.

„Амазон“ претходно беше казнет со 746 милиони евра од Луксембург, а ирскиот регулатор, исто така, изрече четири казни против платформите на „Мета“, Фејсбук, Инстаграм и Ватсап кои се движат помеѓу 405 и 225 милиони евра во последните две години.

Ирското тело за заштита на приватноста соопшти дека „Мета“ користи правен инструмент познат како стандардни договорни клаузули за преместување на податоците во САД и „не се осврна на ризиците за основните права и слободи“ на европските корисници на Фејсбук покренати со значајна пресуда на највисокиот суд на ЕУ.

Прекршокот на Мета е „многу сериозен бидејќи се однесува на трансфери кои се систематски, повторливи и континуирани“, рече Андреа Јелинек, претседател на Европскиот одбор за заштита на податоци.

„Фејсбук има милиони корисници во Европа, така што обемот на пренесени лични податоци е огромен. Казната без преседан е силен сигнал до организациите дека сериозните прекршоци имаат далекусежни последици“, додаде таа.

„Мета“, која исто така ги поседува Вотс ап и Инстаграм, соопшти дека ќе поднесе жалба на пресудата, вклучувајќи ја и паричната казна. Нема да има итен прекин на Фејсбук во Европа, додаде таа.

Компанијата рече дека коренот на проблемот потекнува од „конфликтот на законите“ меѓу американските правила за пристап до податоци и правата на приватност на Европејците. Креаторите на политиката на ЕУ и САД беа на „јасен пат“ за решавање на овој конфликт според новата трансатлантска рамка за приватност на податоците.

Европскиот суд на правдата во 2020 година го укина договорот ЕУ-САД познат како Штит за приватност поради стравувањата од американските разузнавачки практики за следење. Во истата пресуда, највисокиот суд на ЕУ, исто така, ги заостри условите за користење на СЦЦ, уште една правна алатка што широко ја користат компаниите за пренос на лични податоци во САД.

„Мета“ – како и други меѓународни компании – продолжија да се потпираат на правниот инструмент додека европски и американски официјални лица се мачеа да состават нов аранжман за проток на податоци. Американскиот  технолошки гигант немаше други правни механизми за пренос на своите лични податоци.

ЕУ и САД го финализираат новиот договор за проток на податоци што би можел да дојде веќе во јули и до крајот на октомври. „Мета“ има рок до 12 октомври да престане да се потпира на СЦЦ за нивните трансфери.

„Оваа одлука е погрешна, неоправдана и претставува опасен преседан за безброј други компании кои пренесуваат податоци меѓу ЕУ и САД“, изјавија во понеделникот претседателот за глобални прашања на „Мета“, Ник Клег, и главниот правен директор Џенифер Њустед.

Ирската комисија за заштита на податоците соопшти дека не се согласува со паричната казна и мерката што ја наметнува на „Мета“, но била принудена од паневропската мрежа на национални регулатори, Европскиот одбор за заштита на податоци, откако првичната одлука на Даблин била оспорена од четворица на неговите колеги регулатори во Европа, од Германија, Франција, Шпанија и Австрија.

Според внатрешните дискусии објавени во понеделникот, ирскиот регулатор претходно оваа година жестоко се расправаше против наметнувањето финансиска казна за гигантот на социјалните мрежи, велејќи дека таквата одлука би била непропорционална за наводните злоупотреби на приватноста. Даблин, исто така, тврдеше дека секоја таква парична казна против „Мета“ може да се смета за дискриминаторска бидејќи американската технолошка компанија „Гугл“ не се соочи со слични казни за други случаи на трансатлантска заштита на податоци. Европското седиштет на „Мета“ е во Даблин, Ирска. (Според агенциите)