Ердоган и духот на Скендербег
Албанците се најдоа повредени од Ердоган да слушаат за време на посетата за отоманското минато на земјата во месецот кога ја слават годишнината од смртта на Скендербег
Последната посета на турскиот претседател Реџеп Таип Ердоган на Албанија не беше како другите во минатото. Секако, албанскиот премиер Еди Рама го почести со црвениот тепих, но поранешната возбуда беше видливо отсутна. Народот и политичката класа беа поделени. Одлуката на Ердоган да ја посети Албанија на годишнината од смртта (17 јануари 1468 година) на Ѓерѓ Кастриот (познат и како Скендербег), албански херој во војната против Османлиите, многумина ја сметаа за провокација, пишува во коментар за грчки „Катимерини“ познатиот новинар Ставрос Ѕимас.
„Додека Ердоган беше во градот Лац, каде што го поздрави отоманското минато на ‘земјата на орлите’ додека ги инаугурираше новите станови финансирани од Анкара за Албанците кои останаа без покрив над главата од земјотресот во 2019 година, неговиот колега Илир Мета му оддаде почит на Скендербег пред неговиот споменик во градот Леже.
Во меѓувреме, за разлика од претходните прилики, властите во Тирана избраа да не ја прикријат огромната статуа на Скендербег на централниот плоштад во главниот град за време на посетата на Ердоган“, пишува Ѕимас.
Во текстот се наведува дека Рама го издигна турскиот лидер наклонет кон исламот во клучен стратешки партнер. „Меѓутоа, арогантното однесување на Ердоган почна да го нервира албанскиот народ, кој чувствува дека се оцрнува нивната национална гордост“, стои во текстот.
Друго контроверзно барање на Ердоган беше Тирана да ги предаде поддржувачите на ФЕТО, движењето Ѓулен кое тој го нарекува терористичка организација (етикета што ја користи за многу негови противници) со значително влијание врз муслиманското население во Албанија, и наместо тоа да постави раководство по сопствен избор над заедницата.
Муслиманската заедница ја отфрли инаугурацијата на џамијата во Тирана, која ја благослови Ердоган. За време на прес-конференцијата, Ердоган рече дека билатералните односи ќе зависат од успехот на Албанија во отстранувањето на ФЕТО од земјата. Рама мораше да интервенира за да го спаси достоинството на својата функција, велејќи дека неговата земја нема никаква обврска кон Турција.
„Албанците можеби ги сакаат парите на Ердоган, но го гледаат како ја навредува нивната национална гордост и сака да ја наметне сопствената религиозна вера“, пишува Ставрос Ѕимас во „Катимерини“.