Енергија без руски гас? Еве каде Фон дер Лајен гледа решение

Претседателката на Европската комисија Урсула фон дер Лајен има јасен став како да се реши енергетскиот проблем без руски гас и се изјасни за нуклеарна енергија, но ваквото размислување не е добро прифатено од многумина во Германија.

Во контекст на глобалната енергетска ситуација, фон дер Лајен повика на развој на нуклеарната енергија. „Мораме да произведуваме сопствена енергија“, рече таа на безбедносната конференција во Прага.

Според неа, за тоа е потребно повеќе енергија од обновливи извори, повеќе атомска енергија и поефикасно производство, пренесува dpa.

Како аргумент за ваквото барање таа ја истакна руската агресија врз Украина.

„Заедно со украинските градови, сега се уништени темелите на безбедноста на кои сметавме“, рече таа.
Таа рече дека со децении многумина објаснувале дека економското вмрежување е вистинскиот извор на безбедност и дека Европа купува руски гас.

„Тоа требаше да гарантира дека Русија никогаш повеќе нема да започне нова војна на стариот континент“, рече фон дер Лајен, признавајќи дека тоа е „заблуда“.

Политичарката, која е членка на германската демохристијанска ЦДУ, во својот говор не кажа дали мисли дека Германија, која дури минатата година се повлече од нуклеарната енергија, сега треба да и се врати.

Инаку, таа беше во три влади на Ангела Меркел, меѓу кои и онаа што во 2011 година одлучи Германија да се повлече од нуклеарната енергија.

Повеќето членки на Европската унија имаат или развиваат нуклеарна енергија.