ЕК уплати 51,7 милиони евра поволни заеми во државниот буџет на Србија

Европската комисија уплати 51,7 милиони евра поволни заеми во државниот буџет на Србија, што одговара на дел од претфинансирањето предвидено во Планот за раст за Западен Балкан, соопшти Делегацијата на ЕУ во Србија.

Се наведува дека дополнителни 59 милиони евра претфинансирање, во форма на грантови и заеми, ќе бидат насочени преку Инвестициската рамка за Западен Балкан (WBIF) за подобрување на инфраструктурата низ целата земја.
Тоа претфинансирање претставува 7 проценти од вкупната финансиска поддршка наменета за Србија во рамките на Планот за раст на ЕУ.

Исплатата на претфинансирањето следи откако српскиот Парламент ќе го ратификува договорот за инструментот и договорот за заем во рамките на Инструментот за реформи и развој. 

Комисијата планираше да ја изврши оваа исплата одамна, но, според дипломатски извори во Брисел, се очекуваше негативните впечатоци да се намалат по посетата на српскиот претседател Александар Вучиќ на Москва и учеството на парадата на Путин на 9 мај.

Оваа исплата докажува дека предупредувањата на ЕУ до Србија дека „ќе има последици“ ако Вучиќ оди во Москва биле само истрели од празен пиштол и дека ЕУ всушност нема намера да ја санкционира Србија за соработка со Русија.

Покрај тоа, на денот кога ЕУ ѝ ги исплати на Србија првите средства од Планот за раст за Западен Балкан, Србија објави дека ќе ги зајакне економските и трговските врски со Русија.

Министерот без ресор во Владата на Србија, задолжен за меѓународна економска соработка, Ненад Поповиќ, учествува на Санктпетербуршкиот економски форум, каде што најави продолжување на соработката со Руската Федерација и компанијата Газпром.

Исплатата на ЕУ кон Србија исто така значи дека ЕУ го потврди „конструктивното однесување“ на Србија во процесот на нормализирање на односите со Косово, бидејќи тоа е специфичен предуслов за добивање помош од овој пакет.

И оваа потврда од страна на ЕУ изгледа контрадикторна, бидејќи земјите од ЕУ во неколку наврати го изразија своето жалење за недостатокот на напредок во нормализирањето на односите и спроведувањето на договорите за дијалог меѓу Косово и Србија.