ЕК и ЕЦБ предупредуваат: Нарушувањата во трговијата ги принудуваат граѓаните да штедат

Очекувањата на европските потрошувачи се влошија во април втор месец по ред, спуштајќи се на најниско ниво за една и пол година, покажува истражувањето на Европската комисија, при што Европската централна банка (ЕЦБ) предупреди дека нарушувањата во меѓународната трговија може да ги поттикнат граѓаните да бидат претпазливи и да штедат.

Индексот што ги мери очекувањата на потрошувачите во еврозоната падна за 2,2 поени во април во однос на март, на минус 16,7 поени, пресмета Комисијата во извештајот објавен во вторник.

Ова е најниско ниво од ноември 2023 година, кога изнесуваше минус 16,9 поени.

Во март тој падна за 0,9 поени, по благ пораст во февруари.

Потрошувачите од ЕУ, исто така, покажаа изразен песимизам во април, при што индексот падна за 2,1 поени на минус 16 поени.

Во март тој падна за еден поен.

Истражувањето покажа дека расположението на европските потрошувачи во април се оддалечило од долгорочниот просек, спуштајќи се на најниско ниво во последните осумнаесет месеци, според Комисијата, која го спроведе истражувањето од 1 до 21 април во 26 земји на ЕУ, со исклучок на Шпанија. Податоците опфаќаат 89,3 отсто од вкупната финална приватна потрошувачка во еврозоната и 90,9 отсто во ЕУ.

Инфлацијата во еврозоната и ЕУ благо ослабна во март, на 2,2 и 2,5 отсто соодветно, покажаа пресметките на Европскиот завод за статистика. Европската централна банка (ЕЦБ) минатата недела повторно ги намали каматните стапки, за четвртина процентен поен, предупредувајќи дека бранот царини создал висок степен на неизвесност за економијата на еврозоната.

Нарушувањата во меѓународната трговија, тензиите на финансиските пазари и геополитичката неизвесност тежат врз деловните инвестиции, а граѓаните би можеле да покажат поголема претпазливост и поголема тенденција за штедење, потенцираат тие.

ЕК на крајот на месецот ќе објави целосен извештај за економското расположение.