Едукативно-забавен настан „Европа низ детските очи“ во чест на Денот на Европа

По повод Денот на Европа – 9 Мај, денеска во Градски парк, кај Школка ќе се одржи едукативно-забавен настан „Европа низ детските очи“.

Организатор е Националната агенција за европски образовни програми и мобилност. Се работи за едукативно-забавен перформанс посветен на децата, со пораки за пријателство, заедништво и европски вредности.

Централната програма, како што е најавено, ќе опфати: изведба на македонската химна и химната на ЕУ од детскиот хор „Златно славејче“, интерактивна театарска претстава на тема „Патување низ земјите на ЕУ“, ди-џеј сет, детски караоке перформанс, зумба и танцување за деца (и за родители).

Во паралелната зона ќе бидат организирани едукативни пунктови: Мали сликари: „Европа низ моите бои“, Квиз-зона: „Колку знаеш за Европа?“ и Креативна работилница: Направи си од пластелин свој европски сувенир.

Настанот е наменет за деца од училишна и предучилишна возраст, а ќе биде збогатен со аниматори, реквизити и симболични награди.