Џафери нема да се извини, одговорноста ја префрли на вработените
Службениците во Собранието се најдобро платени од сите институции, а пак не ја завршија работата како што треба, се правда Џафери
Собранискиот спикер Талат Џафери нема да се извини на собраниските службеници што ги навредуваше, а за што јавноста дозна преку Собранискиот канал. На брифинг со новинарите денес тој одби да одговари конкретно за својот дел од одговорноста, сугерирајќи практично дека службите направиле грешка со материјалите на седницата и не си ја извршиле добро работата.
„Не сметам дека сум прекршил нешто, останатото е мислење на јавноста. Јавноста си го кажа своето“, кажа Џафери. Запрашан дали им се извинил на службениците, тој одговори дека тие самите треба да кажат.
Притоа тој тврдеше дека не ги пцуел вработените, туку тоа била реакција поради нивниот однос кон работата: „Тоа е кон одговорноста, кон односот, кон работата“.
На посочувањата дека сите институции, вклучително и Собранието имаат кодекс на однесување, тој кажа: „Не чувствувам одговорност да се извинам“.
Според него, службениците во работно време шетале низ центарот на Скопје наместо да работат и го згрешиле материјалот за 71. седница.
„Немам објаснување. Јас сум претседател на Собранието и со Деловник е пропишана мојата надлежност. Треба да создадам предуслови и услови за работа. И ако некој мисли дека треба да ја помине службата на улица ‘Македонија’, претпоставувам дека граѓаните не сакаат таква служба. А ние како раководство на Собранието ги направивме сите предуслови да создадеме соодветни услови за службата, статусно, институционално и материјално. Службеник во Собранието зема 20 отсто има повеќе плата од сите свои колеги во други институции“, кажа Џафери.
Своето однесување за кое една недела не даде никаква изјава во јавност, го правдаше и со тоа дека тој како претседател спречил катастрофа на 71. седница по која им врескаше на службениците.
„Доколку се оди до крај, за таква грешка се оди дома. Материјалот што се подготвил по гласање на дневниот ред, така како што беше подготвен, ја враќа седницата на почетокот. Ако не ја увидев грешката, можеше да дојдеме до ситуација да не може да се врати седницата. Тоа не е лична работа, таа е одлука на Собранието. Собранието одлучува по дневниот ред. Такви материјали значеа седницата да се врати назад“, дообјаснуваше Џафери.
Џафери дека нема да испитува дали намерно се оставени вклучени микрофоните по седницата, кога тој почнал да цуе.
„Не е целта лов на вештерки. Да ги ловам грешките на вработените. Суштината е да ги извршуваат соодветно обврските. Ако продолжат ваквите грешки, ќе има соодветна постапка“, објасни Џафери.
За барањето на оставка од страна на ВМРО-ДПМНЕ, Џафери рече дека „немаат со што да се бават, па се бават со мене. Треба да им затворам усти?“.
Џафери потврди дека е покрената соодветна процедура во Комисијата за деловнички и мандатно-имунитетни прашања и материјалот е процесуиран, но не сакаше да коментира дали има основа за негова суспензија.
„Пратеничката група на ВМРО-ДПМНЕ треба да води сметка за тоа што тие направиле, а не да оценуваат дали претседателот го прекршил етичкиот кодекс на Собранието”, вели Џафери. (Н.В.)