Дури и „Зум“ им порачува на своите вработени да се вратат во канцелариите
„Зум“ (Zoom), компанијата што направи револуција за работа на далечина за време на пандемијата, им порачува на своите вработени да се вратат во канцелариите.
Во соопштението, „Зум“ вели дека сега спроведува „структуриран хибриден пристап“, што значи дека вработените кои живеат во близина на канцеларијата „треба да бидат на лице место два дена во неделата“, бидејќи тоа е „најефективно“ за услугата за видео-конференции.
„Како компанија, ние сме во подобра позиција да ги користиме нашите сопствени технологии, да продолжиме да иновираме и да ги поддржуваме нашите глобални клиенти. Ќе продолжиме да ја користиме целата платформа „Зум“ за да ги одржуваме нашите вработени и дисперзираните тимови поврзани и да работат ефикасно“, велат од компанијата.
Оставајќи ја настрана иронијата, „Зум“ не е исклучен од трендот за враќање во канцеларија што ги опфаќа технолошките компании. Во последниве месеци, „Гугл“, „Амазон“ и „Сеалсфорс“ (Salesforce) донесоа слични насоки, ставајќи крај на пристапот од ерата на Ковид кој им даде на вработените поголема слобода да работат од дома. Сепак, бизнисите се соочија со одредено одбивање од вработените откако тие се навикнаа на поголема флексибилност.
Дури и Белата куќа ја спречува работата на далечина. Минатата недела, побара од агенциите на кабинетот почесто да ги враќаат федералните работници во канцелариите во наредните месеци, според внатрешната е-пошта која ја доби „Си-Ен-Ен“ (CNN).
Директивата на шефот на кабинетот на Белата куќа, Џеф Зиентс, која го наведува ставот на администрацијата во последните две години, е досега најсилниот показател дека верува дека присуството во канцеларијата е од клучно значење за агенциите да ја спроведат својата агенда, поради критичните избори кои претстојат.
„Зум“ имаше свои тешкотии бидејќи побарувачката опаѓа по бранот поттикнат од пандемијата. Во февруари, „Зум“ намали приближно 15 отсто од својот персонал, што изнесува околу 1.300 вработени, по извонредно брзиот раст. Членовите на извршниот раководен тим, исто така, ги намалија своите основни плати за 20 отсто за претстојната фискална година и ги загубија бонусите од фискалната 2023 година.
За повеќето компании, услугата за видеоконференции ги дефинира раните денови на пандемијата, бидејќи многумина се свртеа кон оваа платформа за видео разговор со пријателите и колегите за време на заклучувањето. До средината на 2020 година, „Зум“ објави вртоглаво зголемување на приходите поттикнати од порастот на деловните клиенти од многу компании кои беа принудени да се свртат кон работа на далечина.
Акциите на компанијата за година дена пораснаа за околу 4 отсто.