ДУИ: Мицкоски и Филипче ќе разговараат како да се отстранат Албанците од власта

Средбата на лидерите на ВМРО-ДПМНЕ, Христијан Мицкоски и на СДСМ, Венко Филипче, ја зголеми нервозата во ДУИ кои подолг период се гледаат себе како жртва на партиски дилови.Во реакцијата денес ДУИ тврдат дека на лидерската средба ќе биде демонстрирана моноетничка коалиција која има за цел да го преобликува политичкиот модел на државата од мултиетничка во моноетничка демократија.  Партијата обвини дека на средбата Мицкоски-Филипче ќе има точки кои нема да ѝ се презентираат на јавноста. 

Првата точка, како што велат од ДУИ, ќе биде неказнивоста, односно каков правосуден систем им е потребен за да не одговараат, јавно да се напаѓаат, а меѓусебно да се штитат дури и во состојба на трагедии како последната во Кочан

Втората точка за која ќе се разговара на лидерската средба, според ДУИ, е како да се отстранат Албанците од сите нивоа на власт во државата, а потоа да се држат на периферијата на општествените текови.

„Овој план не е нов, скорен е пред три години преку ноторниот договор Мицкоски-Заев пред сѐ како заштитен чадор за транзициската олигархија во земјава. Планот веќе се реализира преку укинувањето на балансерот, моноетничкото одлучување на Уставниот суд, но и отстранувањето на Албанците од голем број високи позиции во државната управа. Реализацијата на овој план е невозможна без да се пронајдат ‘чесните Албанци’ кои треба да обезбедат лажна легитимација за мултиетнички консензус на ова политичко преструктуирање“, велат од ДУИ во пресрет на средбата на премиерот и лидерот на СДСМ.

Дополнително, партијата ги повика лидерите на коалицијата „Вреди“, заедно или одделно, да изразат јасен револт против обидот за, како што велат, реструктуирање на државата и да не дозволат да бидат вовлечени во планот за целосна дисквалификација на Албанците од општествените текови.