Директорот на Агенцијата за одземен имот подарил џип на џамија и трактор на Општина Арачиново

Директорот на Агенцијата за управување со одземен имот, Дритон Небиу, кој доаѓа од Алијанса за Албанците, доделил комбе на џамија во Арачиново, трактор со приколка на Oпштината Арачиново, а најави дека донации со одобрение на Владата ќе добие и Бигорски манастир.

„Општина Арачиново не е заборавено село туку е општина која заслужува и има потреба од грижа, особено од државните институции, порача Небиу на Фејсбук. 

Тој објави дека конечно било одобрено и барањето за општина Арачиново да им биде отстапен трактор со приколка со цел да се олесни одржувањето на околината на општината. По реакциите во јавноста, Небиу излезе со дообраснување посочувајќи дека Агенцијата  не направила никаков законски прекршок со отстапувањето на возило, туку напротив постапувала согласно законските надлежности.

-Откако сум на функција како директор во Агенцијата,  имам одговарано на секое барање доставено до нашата институција, меѓу кои беше и барањето од страна на џамијата во Арачиново. Како што е веќе познато на јавноста, Агенцијата согласно законот бесплатно отстапува  одземени предмети на други државни органи и надлежни институции преку кои отстапените  средства се донираат  за потребите на  оние кои доставуваат барања.

Така е и во овој случај: Агенцијата согласно законот, на нивно барање изготви предлог кој ќе биде проследен до управниот одбор и Владата на РСМ за добивање согласност, за која што верувам дека ќе биде позитивна, со оглед на тоа што верските џамии или цркви се институции од општествен карактер,  чија намена е за граѓаните, за споделувањето и ширењето на мир и спокој во општеството. Ние секогаш стоиме во интерес и за доброто на граѓаните, надлежната дејност која Агенцијата за управување со одземен имот ја врши во поглед на социјалната реупотреба и бесплатно отстапување на одземени добра за општествени цели во која граѓанскиот сектор ќе биде и понатаму примарен  приоритет во работењето, порача Небиу.