Де Брујне објави емотивно збогување со Манчестер Сити

Белгискиот играч за врска на Манчестер Сити, Кевин Де Брујне објави денеска емотивно писмо во кое потврди дека ова се неговите последни месеци во клубот.

По десет години минати во синиот дел на Манчестер, Белгиецот реши да се прости од „Граѓаните“, нагласувајќи дека Манчестер стана негов дом, а од клубот и навивачите добил сè што можел да посака.

Во своето писмо, Де Брујне се заблагодари на „семејството, соиграчите, пријателите и на сите што му помогнаа за време на ова неверојатно патување“. Тој истакна дека не му било лесно да ја донесе оваа одлука, но дека неговото поглавје во Сити сега е завршено.

Во текот на деценијата помината во Манчестер, Де Брујне освои сè – Премиер лигата, ФА Купот, Лига купот и на крајот Лигата на шампионите, прва во историјата на клубот.

Во последните месеци се пишуваше дека Де Брујне би можел да ја продолжи кариерата во Саудиска Арабија или некоја од другите богати фудбалски дестинации надвор од Европа, но засега ништо не е потврдено.