ЦУК: Патот кон манастирот „Св.Ѓорѓија“ исчистен од снег, а загрозените лица кои немале лекови пренесени во Прилеп


Фото: Б.Грданоски
 
Регионалниот ЦУК (РЦУК) Прилеп извести дека во 15.20 часот, вчера, преку Единствениот повикувачки бројот за итни повици е пријавено од страна на Управа на Манастирот „Св. Ѓорѓија“ од Прилеп дека патниот правец кон манастирот во должина од два (2) километра е со навеви од снег и бил непрооден. Во манастирот во тој момент се наоѓаат две лица кои не можеле пеш да се симнат, вратат, до патот Прилеп – Велес за да бидат земени и да бидат пренесени во градот. Лицата немале редовна медицинска терапија (лекови).
По комуникацијата на дежурните од ЦУК, според оперативните процедури, остварени со одговорните на ЈП за одржување на магистрални и регионални патни правци на пунктот за Прилеп, прво е добиена информација дека вчера машина чистела до месноста „Каменлом“ и машината била замината на расчистување другите патни правци согласно планот и приоритетот за одржување на патните правци. Практично, во случајот, се работело за нерасчистен, завеан, тампониран пат во должина од два (2) километра. До ЦУК информирале, во прво време, дека поради доцно пријавување и настапување на ноќта расчистувањето ќе се продолжи во текот на утрешниот ден. Двете лица во тој момент се наоѓале во манастирот.
Доцна попладнето, од страна на РЦУК Прилеп биле известени надлежни институции од Системот за управување со кризи (СУК) и било договорено дека од претпријатието „Фирмер Балкан“ (популарно познато како „Турски рудник’) да испратат багер и истите за 15 минути ќе почнат со расчистување на патот. Првично, се проценуваше дека патот во вечерните часови ќе биде расчистен и лицата ќе бидат пренесени во градот Прилеп. Тоа и се остварило, а официјалната потврда за брзата и правовремена интервенција е добиена утрово со редовниот извештај до ЦУК. Конкретно, сношти, со помош на багерот од фирмата „Фирмер Балкан“ патот кон манастирот „Св.Ѓорѓија“ е исчистен од снежните навеви, а лицата коишто немале можност да се пробијат низ завеаната делница од патот и немале лекови биле безбедно се пренесени во градот Прилеп.