„Чувствувајте се оваа ноќ, како цвет во камен бидејќи во историјата нема случајности“. Џон Малкович прогласен за почесен доктор на Еуро Прима

Славниот холивудски актер Џон Малкович, синоќа, на свечена вечера,  во Скопје , беше прогласен за почесен доктор ( Doctor Honoris Causa) на универзитот Еуро Прима, чиј претседател е Јордан Плевнеш, со што ќе се се вброи во плејадата на големите имиња како што се Јиржи Менцел, Шарл Азнавур, Маноел Де Оливеира, Жан Клод Кариер, Мики Манојловиќ, Александар Морфов, Абдулах Сидран, Мето Јовановск и други.

Плакетата му ја врачи Плевнеш, македонски автор со интернационално реноме, кој одржа брилјантна беседа за Малкович.

„Независен“ ја пренесува во целост. 

„Вечерва драги Џон Малкович, Македонија и целиот Балкан ве дочекуваат како свој изгубен син бидејќи со вашето животно патешествие по татко, потекнувате од овој полуостров што Никола Бувие го нарече Срцето на Европа. И затоа сите ние, балканските народи ве чувствуваме како свој , бидејќи со вашата импресивна уметничка биографија вам ви е татковина целата Планета Земја, а во античката лингвистичка традиција зборот Planetos означува осамен човек или скитник бидејќи токму 7 градови од античкиот свет спорат од каде потекнува Хомер. Во името на балканофилијата ќе ве пречекаме со една од најубавите метафори на балканската митологија:  „Окован во тело, духот растеше како цвет во камен“ . Чувствувајте се оваа ноќ, како цвет во камен бидејќи во историјата нема случајности. И нашиот универзитет Еуропа Прима го прогласи за свој прв Doctor Honoris Causa Токму Маноел Де Оливеира со кого вие снимавте филм во 2003 година, а оттогаш Doctor Honoris Causa на нашиот универзитет станаа и Оскаровците Клод Лелуш и Јиржи Менце, легендарниот Шарл Азнавур, светските трагачи по уметничкиот бескрај Роберт Вилсон, Жан-Клод Кариер, Кшиштоф Зануси. А вечерва со Вашето име, Македонија позната во модерната митологија како земја која е слична на Бескрајот бидејќи и Бескрајот и Македонија граничат сами со себе, ние ве прогласуваме за Doctor Honoris Causa, зашто вие самиот сте Бескрај што зрачи на сите меридијани. Ќе ни требаат најмалку 100 ноќи за да ги наброиме сите ваши филмски и театарски креации и како актер и како режисер.

Но, дозволете ми на небото над Камник, да ги спомнам ликовите кои се дојдени да ви го честитаат ова највисоко академско признание – Како Волкер Шлендорф, Пол Њумен, Стивен Спилберг, Бернардо Бертолучи и голем број други бесмртни имиња со кои вие оставивте во светската култура неизбришливи траги. Како естетски крешчендо на оваа ноќ во Македонија сакам да го истакнам вашиот однос кон времето бидејќи во историјата на светската цивилизација од Месопотамија и Вавилон и Епот за Гилгамеш, до Помпеја и средновековните мистици постои таканаречената Временска Капсула во која вие ја вградивте и вашата лична тајна снимајќи го филмот посветен на мистеријата „Меѓу Минатото, Сегашноста и Иднината“ за кои што вие напишавте сценарио и ја играте главната улога, во режија на Роберт Родригез. Филмот беше завршен на 18 ноември 2015 во Коњак во Франција и беше запечатен без право да биде отворен во следните 100 години, до 18 ноември 2115.

Во романот на Жак Лакариер посветен на крајот на Втората светска војна открив дека и Претседателот на САД, Двајт Ајзенхауер остави запечатен материјал во временска капсула на Американските гробишта во Colleville sur Mer – Нормандија која што треба да биде отворена 100 години по Денот Д – Истоварувањето на Нормандија.

Вашето прогласување за Doctor Honoris Causa сакам да го поврзам со средновековниот богомилски апокриф од Македонија, кој што вели: Сегашноста е тука, иднината е непозната, единствено што е непредвидливо е минатото! Бидејќи вие ја одредивте бројката 100 таа може да биде и 1000 и 10 000 и така натаму со сите други нули. Сакам, прогласувајќи ве за Doctor Honoris Causa, да ве прогласам за Син на Вечноста во Минатото кое никогаш не минува и Иднината која никогаш не завршува!

Брилијантната и долгоочекувана изведба на славниот Малкович во театарската претстава „Пеколна комедија: Исповеди на сериски убиец“,  предизвика бурни овации и ракоплескање кај публиката на Антички, на „Охридско лето“. Настапот сигурно ќе остане редок настан за паметење кој понуди магичен амбиент и уникатност, збогатувајќи ја реномираната фестивалска историја на престижниот фестивал.  Во авторство и во режија на Михаел Штурмингер, ова несекојдневно уметничко остварување, музички придружено од сопранистките Чен Реис и Сузан Лангбеј и Оркестарот на Виенската академија, ја спои класичната музика со драмската уметност и актерството.