Чкрипи ли во владејачката коалиција: Пратеникот Милошоски против министерот Игор Филков

Пратеникот на ВМРО-ДПМНЕ и потпретседател на Собранието, Антонио Милошоски синоќа му даде лоша оцена на министерот за правда Игор Филков, велејќи дека има слаб придонес во областа со која раководи. На ова министерот Филков возврати кон Милошоски нарекувајчи го „Кусурот на Груевски, познат под прекарот ‘Џуџето од Небрегово’“. Дали е ова најавува дека нешто чкрипи во владејачката коалиција, имајќи во предвид дека Милошоски доаѓа од редовите на ВМРО-ДПМНЕ, а министерот Филов е од ЗНАМ.    

Милошоски синоќа на гостување во емисијата „Топ тема“ на телевизија Телма рече дека тоа е негов личен став. 

„ Ова е мој личен став, не значи дека е став на партијата или пратеничката група. Јас сметам дека министерот за правда има слаби перформанси по однос на обврските коишто ги има преземено за реформите во правосудството. Тоа е мое мислење“, рече Милошоски.

Посочи дека очекувал досега барем во нацрт верзија до Собранието да бидат доставени Предлог-законот за судови, Предлог-законот за судски буџет, Предлог законот за јавнообивнтелстка служба, новиот Кривичен законик …… 

Министерот за правда доаѓа од редовите на ЗНАМ, коалиционен партнер во Владата. Тој во реакцијата до медиумите за Милошоски вели дека е „Кусурот на Груевски, познат под прекарот ‘Џуџето од Небрегово’, а јавноста добро го памети по аферите поврзани со АМСМ и семејните бизниси од Кичево, изгледа дека сè уште нема навика да одговара пред граѓаните кои го избрале“.

„Бидејќи очигледно е неинформиран и изолиран од партијата, го упатувам во неговата матична партија или пак во Владата – можеби конечно ќе го известат за постапките, роковите и статусот на законите!“, вели Филков во реакцијата.

Во остро интонираното соопштение министерот за правда прашува: „И, бидејќи изгледа како некој што работи по туѓи наредби, за кого одработува во моментов? Дали се тоа интересите на граѓаните или некои други агенди? Во минатото е познат по Ванчо Михајлистички ставови, многу лаги и невистини. Ова е лош де-фокус на македонската јавност по двонеделниот „одмор“!“.

Филков уште додава дека откако Милошоски се повлекол од функцијата министер за надворешни работи, активно учествувал во креирање на, како што вели,  „канцерогениот“ правосуден систем.

„Сега е добар момент да се потсети јавноста дека токму тој директно учествуваше во процесот на донесувањето на штетните измени на КЗ во 2023 година, со што  се спаси од одговорност за кривичното дело ,,Моќник”“, вели Филков.

Потоа тој набројува повеќе закон кои што се во процедура како Законот за спречување на корупција и судир на интереси (подготвен и објавен на ЕНЕР), Предлог закон Закон за судска служба – подготвен и објавен на ЕНЕР, Предлог закон за платите на јавните обвинители (МП го достави предлог законот до Влада во септември 2024 година, но тој беше одложен поради немање финансиска согласност од ресорното министерство. Законот ќе се реактивира, обезбедени се финасиски средства во 2025 година за негова имплементација.), Закон за јавно обвинителство (подготвен е и ќе се објави на ЕНЕР). Според реформската агенда овој закон заедно со законот за Совет на јавни обвинители треба да се бидат донесени најдоцна до декември 2025 година, Закон за Судски совет (треба да се донесе до јуни 2025, моментално е во завршна фаза, по преводот и ќе се испрати на мислење на Венецијанска комисија и Европска комисија) и тн.