China Railway Group Limited заинтересирана за капитални проекти во Македонија


Министерот за транспорт и врски, Горан Сугарески и директорот на Македонски Железници – Инфраструктура, Ирфан Асани, денеска имаа средба со претставници на кинеската компанија China Railway Group Limited.

На средбата, како што соопшти министерството, се разговарало за инфраструктурните проекти во делот на изградба и реконструкција на Железницата во Република Македонија.

Сугарески пред претставниците на China Railway Group Limited ги презентирал проектите на Владата на Република Македонија за изградба на нови пруги во земјата, како и условите за учество на јавните повици за нивна реализација.

– Денеска остваривме значајна средба со претставниците на компанијата China Railway Group Limited на која ги презентиравме сите проекти во делот на железничката инфраструктура. Исто така ги запознавме и со проектите кои планираме да ги реализираме во периодот што следува за што ги повикавме да се приклучат кон јавните повици. Средбата беше одлична можност да ги слушнеме нивните планови за реализација на проекти што се од регионално значење, изјави министерот Сугарески.

Претставниците на кинеската компанија ги презентирале проектите на кои работат во моментов и покажале интерес за учество во изградба на капитални проекти и во Република Македонија.