Цената на нафтата на највисоко ниво во последните седум месеци

Глобалната цена на нафтата се зголеми во вторникот на највисоко ниво во последните седум месеци, делумно поттикната од загриженоста дека зголемените тензии на Блискиот Исток би можеле да ја намалат понудата.

Суровата нафта од типот „брент“, светскиот репер за нафта, се искачи за дури 1,8% до 89 долари за барел, што е највисоко од почетокот на септември, пред малку да ги намали тие добивки кон средината на попладневните часови во Европа.

Во меѓувреме, суровата нафта West Texas Intermediate, американскиот репер, исто така порасна за 1,8% и достигна петмесечен максимум од 85 долари за барел. Цените на Brent и WTI се зголемија за 15% и речиси 19% од почетокот на годината, соодветно.

Ова се заканува со натамошен раст на цените на бензинот во САД и на други места.

Ричард Бронз, ко-основач и шеф на геополитиката во фирмата за податоци Energy Aspects, рече дека порастот на цената на нафтата е резултат на „засилувањето на моментумот“ во изминатите неколку недели.

„Имате постојани украински напади врз руските рафинерии… Нападите на Хутите врз бродовите во Црвеното Море“, како и „општото чувство дека Блискиот Исток е помалку стабилен отколку пред една година“, изјави тој за Си-Ен-Ен.

Додадено на тоа е побавно од очекуваното закрепнување на производството на нафта во САД, откако студеното време ги ограничи операциите во јануари, истакна тој.

Во суштина, „имате ситуација кога понудата е во ‘кусок’“, рече тој.

Геополитички тензии

Пишувајќи за повисоките цени на нафтата во вторникот, Софи Лунд-Јејтс, водечки аналитичар на капитал во компанијата за финансиски услуги Hargreaves Lansdown, ја издвои ескалацијата на геополитичките тензии на Блискиот Исток по воздушниот напад врз амбасадата на Иран во Сирија во понеделникот.

Иран и Сирија го обвинија Израел дека стои зад нападот, а Техеран предупредува на „сериозен одговор“.

Израелската војска изјави за Си-Ен-Ен дека не ги коментира странските извештаи. Сепак, воен портпарол рече дека Израел верува дека целта била „воена зграда на силите Кудс“ – единица на елитната иранска Револуционерна гарда одговорна за странски операции.

Бомбардирањето на амбасадата на Иран во Дамаск уште еднаш го зголемува сеништето дека војната меѓу Израел и Хамас во Газа ќе се прелее во регионален конфликт што на крајот може да го наруши снабдувањето со нафта на светските пазари.

Цените на Брент се приближуваат до 92,40 долари за барел – максимум на 19 октомври, помалку од две недели откако милитантите на Хамас започнаа невиден напад врз израелски војници и цивили, при што загинаа повеќе од 1.200 луѓе и киднапираа околу 200 други.

„Иако војната во Газа досега значително не го наруши снабдувањето со нафта, пазарите се јасно загрижени дека ескалацијата на конфликтот може да ги вклучи главните земји производители на нафта во регионот“, рече Бил Ведерберн, економист за стоки во Капитал Економикс.

Покрај тоа, додаде тој, постојат знаци дека побарувачката на нафта во Кина може да се зголемува. Како ретка добра вест за втората по големина економија во светот, нејзиниот официјален индекс на менаџери за набавки ја покажа првата експанзија во производството во последните шест месеци, пишува Си-Ен-Ен.