Цената на бакарот се доближува до рекордни нивоа

Клучниот индустриски метал надмина 5 долари за фунта (0,45 кг) за прв пат по неколку месеци, што сугерира дека загриженоста за снабдувањето ќе ги надмине глобалните економски нарушувања.

Порастот на цените на бакарот е целосно поттикнат од стравувањата од можни универзални царини за целиот увоз на бакар во САД, велат аналитичарите, посочувајќи дека тие се многу зависни од странскиот бакар, бидејќи увозот покрива околу 45 отсто од побарувачката, пренесува „Мајнинг“.

САД се соочуваат со пораст на увозот на бакар додека трговците ширум светот се обидуваат да ги надминат потенцијалните царини планирани од американскиот претседател Доналд Трамп.
Според извори на Блумберг, меѓу 100.000 и 150.000 тони рафиниран бакар би можеле да пристигнат во САД во следните недели. Ако целиот тој волумен пристигне во истиот месец, ќе го надмине рекордот поставен во јануари 2022 година, кога беа увезени 136.951 тони.

Големите трговски компании како Trafigura Group, Glencore Plc и Gunvor Group пренасочуваат големи количини бакар наменети за азиските пазари во САД. Затоа трговците на мало закажуваат дополнителен капацитет за складирање во Њу Орлеанс и Балтимор.

Наглото зголемување на увозот на бакар во САД има глобални последици, бидејќи ги намалува резервите во другите делови на светот, вклучително и Кина, која е најголемиот потрошувач на бакар. Цените на бакарот во САД сега се значително повисоки отколку на другите пазари, што предизвикува зголемени трошоци и прекини на синџирот на снабдување за американските производители – слични на оние што би можеле да настанат во случај на целосна трговска војна.

Кон крајот на минатиот месец, Трамп му нареди на американското Министерство за трговија да ги истражи можните царини за бакар поради национална безбедност. Ова предизвика зголемување на цените на бакарот на Њујоршката трговска берза (Comex), каде што фјучерсите ги надминаа светските ценовни одредници.