Булеварот „Крсте Мисирков“ кај МАНУ, пуштен за сообраќај

Со вчерашното ноќно бележење на реконструираниот коловоз на булеварот „Крсте Мисирков“ кај МАНУ, овој булевар беше завршен за рекордно време од 16 дена и од денеска е отворен за сообраќај, соопштија од Град Скопје.

Овој многу фреквентен дел од булеварот „Крсте Мисирков“ изминативе денови се реконструираше на потегот од зградата на МАНУ до крстосницата кај „Мавровка“, во должина од 550 метри.

За реконструкцијата на оваа сообраќајница од Буџетот на Град Скопје се одвоени околу 32 милиони денари.

Градот Скопје пред две години го обнови делот од овој булевар на потегот од „Мавровка“ до Бит-пазар, а го реконструира и булеварот „Кочо Рацин“, на потегот од  булеварот „Кузман Јосифовски-Питу“ до булеварот „Свети Кирил и Методиј“.