Бујар Османи: Секој што прави чекор кон ЕУ станува цел на напади

Кандидатот за градоначалник на Чаир, Бујар Османи, смета дека земјата веќе ги има добиено сите неопходни гаранции од ЕУ и дека сега е време за одлучни чекори напред, а не за политички игри.

 

„Северна Македонија ги доби гаранциите во моментот кога ја дефинираше преговарачката рамка. Таму сите прашања се регулирани. Сега не треба да се злоупотребува темата за ЕУ,“ рече Османи.

 

Тој посочи дека европската перспектива на земјата е тесно поврзана со историските предизвици и притисоци од „српскиот свет“, кој и денес функционира како паралелен систем што ја саботира европската агенда.

 

„Сега има две опции – или си со ЕУ или си со српскиот свет, сива зона нема. Тие се меѓусебно поврзани. Секој што прави чекор кон ЕУ, се оттргнува од српскиот свет. И, дали сте забележале? Секој што прави чекор кон ЕУ станува цел на напади,“ изјави Османи.

 

Тој потсети и на историските настани што покажуваат колку е оваа дилема длабоко вкоренета:

 

„Знаете кога се случи атентатот врз Глигоров? Еден ден откако се врати од Белград и соопшти дека ќе се оттргнеме од Југославија. Знаете ли зошто секој обид за договор со Бугарија и со Грција, или за приближување на земјата кон ЕУ, наидува на демонизација и пропаганда? Затоа што секој чекор кон ЕУ е чекор на оттргнување од српскиот свет. Секој чекор назад е чекор кон српскиот свет“ – рече Османи.

 

Тој  остро ја осуди политиката на актуелната влада, обвинувајќи ја за сервилност и блокада на европската перспектива:

 

„Оваа влада ја блокира европската перспектива, затоа сме претворени во бебе на српско-рускиот свет, кој ги има заробено сите инструменти.“ – заклучи тој.

 

Тој зборуваше и за епизодата со безбедносниот сертификат на Скендер Реџепи, кок како претседател на собраниската Комисијата за надзор над работата на Агенцијата за разузнавање и на Агенцијата за национална безбедност, не може да добие безбедносен сертификат, оценувајќи дека тоа му се прави намерно со цел да не може да свика состанок. реџепи инаку е од редовите на ДУИ. Тој додаде и дека мора да прекине циклусот на прислушување и потсети дека дека лично бил жртва на тоа.

„Мислам дека намерно не му се дава сертификат на претседателот на Комисијата со цел да нема состанок за да не може да се отвори ова прашање. Ние инсистираме да се отвори ова прашање, бидејќи ако некој бил жртва на прислушување, сме биле ние во партија – јас лично. Така што, посебно сме заинтересирани кој, како, што, затоа најбрзо да се реши ова прашање, да се одржи состанокот, да се декласифицираат сите документи, за да може да се види. Мора да прекинеме, вие гледате дека секој десет години ова држава влегува низ циклус на прислушување, треба ли да се прекине еден ден? Очигледно граѓаните не се веќе безбедни, и затоа ние сме да се отвори целосно тоа прашање“, рече Османи.

На изјавата на Османи реагираше ВМРО-ДПМНЕ. 

„Бујар Османи како претседател на пола свет, не успеа да направи ниту еден чекор напред за влез на државата во ЕУ, туку напротив, ги распродаваше името, јазикот и идентитетот, заедно со Заев, Филипче, Пендаровски, Ахмети и на ним слични.Политиката на најкриминалната Влада во историјата на Македонија, на СДС и ДУИ, беше да се удоволуваат потребите и барањата на Бугарија, со цел да останат ден повеќе на власт.СДС и ДУИ, газеа врз достоинството и почитта на државата, и мислеа дека така ќе ги освојат симпатиите на народот, којшто на минатите избори ги испрати во историјата.Погубните политики за Македонија завршија. Сега ВМРО-ДПМНЕ гордо ја претставува државата во светот“, реагираа од ВМРО-ДПМНЕ.