Брегу: Западен Балкан разединет тоне, обединет опстојува

Брегу додаде дека слична е состојбата и со странските инвестиции. Тие имаат нагорен влезен тренд, наспроти излезниот, а најголемиот дел инвестиции доаѓаат од компании во Европа.

– Поделените пазари не можат многу затоа што се мали, секои со свои проблеми. Меѓутоа, заедно можат да бидат интересен пазар и затоа треба да бидеме свртени кон регионалната соработка, бидејќи токму со тоа ги одржуваме стабилноста, соработката и мирот во регионот, истакна Брегу.

Таа нагласи дека „во прилог на тоа зборуваат и две бројки од годинешното издание на Балканскиот барометар, истражување на јавното мислење и на бизнис заедницата што го спроведува РСС“.

– Имено, првпат во последните четири години повеќе од половина од граѓаните, 56 отсто, веруваат дека европската интеграција би ги подобрила нивните животи, а дури 70 отсто е бројот на оние кои веруваат дека тоа побрзо би се остварило преку регионална соработка, додаде Брегу зборувајќи на посебен собир што го организираа ЕБОР и Европската унија.