„Бионтек“ купи кинеска компанија со ветувачки лек за рак

Германската фармацевтска компанија „Бионтек“ (BioNTech), која се здоби со глобална популарност по раната вакцина против коронавирус, го поттикна развојот на својот лек за рак со купување на кинеската компанија „Биотхеус“ (Biotheus).

Групацијата со седиште во Мајнц во средата објави дека ќе плати до 950 милиони долари, вклучително и плаќање однапред од 800 милиони долари.

Завршувањето на преземањето на кинеската компанија со околу 300 вработени се очекува во првиот квартал на 2025 година.

Со купувањето, „Бионтек“ ќе обезбеди целосни светски права на кандидатот за лекови наречен BNT327, кој веќе е во напредна фаза на клинички развој.

Според „Бионтек“, резултатите од клиничките испитувања на лекот на повеќе од 700 пациенти третирани од различни видови тумори се охрабрувачки.

Ко-основачот на „Бионтек“, Угур Сахин, рече дека компанијата верува дека активната состојка има потенцијал да постави нов стандард во третманот на одредени видови на рак.

Неколку студии со активната состојка, на пример за третман на рак на белите дробови и дојка, треба да започнат оваа и следната година.

Аквизицијата, исто така, му обезбедува на „Бионтек“ центар за истражување и развој и производствен капацитет во Кина.

„Бионтек“ има за цел прво одобрување на пазарот за лек за рак во 2026 година.