Белоруска скијачка ја напушти земјата по забраната поради политички ставови
На Дарја Долидович (17) ѝ беше одземено правот да се натпреварува поради тоа што татко ѝ учествувал на антивладините протести
Белоруска крос-кантри скијачка ја напушти земјата со своето семејство поради стравувања од одмазднички акции на властите, откако ѝ било забрането да се натпреварува поради политичките ставови на семејството, рекоа таа и нејзиниот татко.
Дарја Долидович и нејзиното семејство сега се во Полска, каде се надева дека ќе продолжи со тренинзите, изјави нејзиниот татко Сергеј, седумкратен олимпиец во крос-кантри скијање кој исто така ја тренира Дарја, за време на видео повик интервју со неговата ќерка во вторникот.
Ројтерс минатиот месец објави дека на 17-годишната Дарја ѝ било забрането да се натпреварува за, како што веруваат Сергеј и неговата ќерка, учество во уличните протести против реизборот на белорускиот претседател Александар Лукашенко во 2020 година, за кои противниците рекоа дека е измама. Лукашенко негираше дека го наместил гласањето.
„На Дарја ѝ е одземено правото да учествува на натпревари“, рече тој. „Не гледам можност таа да ја продолжи кариерата во Белорусија. Можеме да бидеме обвинети за организирање демонстрации и извикување пароли (опозиција), а потоа да бидеме испратени во затвор“, рече тој. „Пред три месеци не можев да замислам, дури ни во ноќен кошмар, дека ќе ја напуштам мојата земја“.
Заминувањето на семејството Долидович доаѓа неколку дена од Зимските олимписки игри во Пекинг, каде што белорускиот национален тим е под лупа по пребегнувањето на спринтерката Кристина Цимануска на Игрите во Токио минатата година.
Дарја, една од најнадежните помлади скијачки во крос-кантри во земјата, минатиот месец рече дека скијачкиот сојуз на Белорусија го деактивирал нејзиниот ФИС код, индивидуален идентификациски број потребен за спортистите да учествуваат на натпреварите што ги води Меѓународната скијачка федерација (ФИС).
Белорускиот скијачки сојуз му кажа на стручниот штаб на Долидович дека го деактивирал нејзиниот ФИС код во декември како одговор на одлуката на Белоруската скијачка федерација за крос-кантри, според писмото од 31 јануари прегледано од Ројтерс. Во писмото не е наведено зошто е донесена таа одлука.
Дарја Долидович оваа година требаше да заврши средно училиште, но не е јасно како ќе го продолжи учењето во Полска.
„Планирав да завршам училиште во Белорусија, но моите родители рекоа дека се селиме“, рече таа. „Вознемирена сум, се разбира. Ќе беше поедноставно да останам неколку месеци и да го завршам училиштето“.
Долидович рече дека сака да продолжи да скија со надеж дека ќе го одржи жив својот олимписки сон.
Неколку елитни белоруски спортисти беа затворени или исфрлени од националните тимови затоа што изразија опозициски ставови и се приклучија на протестите што избувнаа во 2020 година поради реизборот на Лукашенко.
Репресијата на белоруските спортисти, вклучително и обидот за насилна репатријација на Цимануска за време на Олимписките игри во Токио, наиде на меѓународна осуда.
Минатата недела, Соединетите Држави објавија дека воведуваат визни ограничувања за неколку белоруски државјани, наведувајќи го случајот на Цимануска и други
На друга белоруска скијачка во крос-кантри, Свјатлана Андриук, исто така и беше одземен ФИС кодот, одлука што ја спречи да учествува на квалификациски настан што можеше да ѝ донесе место на Олимпијадата во Пекинг.
Андриук, која минатиот месец изјави за Ројтерс дека била обвинета дека е поддржувач на опозицијата, ги опиша нејзините политички ставови како неутрални. (Според агенциите)