Белград: Завршна конференција за создавање на универзитети без корупција

Завршувањето на проектот „Универзитети без корупција во Албанија, Северна Македонија и Србија“ беше одбележано со финална конференција на тема „Достигнувања и иднина – создавање на универзитети без корупција“ која се одржа во Белград. Овој значаен настан ја означи кулминацијата на напорите за поттикнување на транспарентноста и интегритетот во високообразовните институции во овие три земји.

На настанот учествуваа клучните носители на интереси вклучувајќи ги партнерите (ИСИЕ – Скопје,  ЦЕСИД – Белград и ИДРА – Тирана), претставниците на програмата СМАРТ Балкан, норвешката амбасада во Белград, Министерството за образование на Србија, универзитетски професори, студенти и граѓанското општество.   

Во текот на изминатите 20 месеци, проектот „Универзитети без корупција“ постигна значителен напредок во борбата против корупцијата во високото образование во Албанија, Северна Македонија и Србија. Конференцијата обезбеди платформа за презентација на овие достигнувања и осмислување на идните стратегии за регионална соработка во оваа клучна област.

Извршниот директор на ЦЕСИД, Бојан Клачар го нагласи значењето на регионалната соработка во борбата против корупцијата. Проектниот менаџер од ИСИЕ Мишо Докмановиќ ги потенцираше иновативните решенија кои беа развиени преку проектот вклучувајќи го дигиталниот асистент за поддршка за пријавување корупција. Дискусиите на конференцијата беа фокусирани на предизвиците за справување со корупцијата во образованието, потребата од рана интервенција и улогата на студентските организации во промовирањето на транспарентноста.

Конференцијата заврши со дискусија за иднината на спречувањето на корупцијата во високото образование, со фокус на приватните факултети и влијанието на вештачката интелигенција и новите технологии. Овие сознанија ќе ја водат следната фаза од напорите за изградба на универзитети без корупција низ целиот регион.

Проектот „Универзитети без корупција во Албанија, Северна Македонија и Србија“ е заеднички напор, поддржан од регионалниот грант на проектот СМАРТ БАЛКАН – Граѓанско општество за поврзан Западен Балкан. Оваа регионална иницијатива е имплементирана од Центарот за промоција на граѓански друштва (CPCD), Центарот за истражување и креирање политики (ЦИКП) и Институтот за демократија и медијација (IDM), со финансиска поддршка од норвешкото Министерство за надворешни работи (НМНР).