Беџети до Мицкоски: Според кои ингеренции ќе ги „влечеш за уши“ обвинетите?

Пратеникот од ДУИ, Блерим Беџети, го праша денес на собраниска говорница премиерот Христијан Мицкоски врз која основа јавно се заканува дека „ќе ги влече за уши“ обвинетите за криминал, во контекст на забелешките дека не е обвинител и дека се меша во истрагите. 

На прашањето на Беџети дали тој е обвинител кога излегува со таква изјава, според кои надлежности ќе го прави тоа  и дали законот му дава такви компетенции, Мицкоски му довикна – според мој закон.

„Тогаш, важи вашиот закон во оваа држава, а не законите и Уставот. Се надевам дека целата јавност го слуша овој одговор“, му реплицираше Беџети и си замина од говорницата.

Мицкоски одговарајќи од говорницата подоцна рече дека Јавното обвинителство ќе се произнесе во следниот период за истрагата и  дека во изјавите никогаш не се изразил за да осуди некого. Апелираше да се почека на исходот и тогаш да се направи заклучок дали имало селективност или не и дали некој друг функционер ќе биде осомничен. Практично тој одговори на забелешката на Беџети дека  „сега главните виновници остануваат недопирливи, а Мицкоски веќе ги објави имињата на осомничените наместо обвинителот“.

„Владата ни вели дека правда ќе има, но вистинската правда треба да произлегува од судството, не од политички прес-конференции. Како може Владата да претендира дека ги прави независно истрагите, кога вие како премиер изјавивте дека документите на локалот се фалсификувани, пред судството да донесе одлука“, возврати Беџети. 

„Јас никогаш не се изразив така како што вие велите, кого било да осудам предвреме, иако ние како политичка партија, јас лично и голем дел од нас, знаеме што значи да се биде жртва на такви политички квалификации. Сме го почувствувале тоа во изминативе 7-8 години, знаеме точно како изгледа сето тоа и не би сакале никому да го правиме тоа“, реплицираше Мицкоски. 

Поводот за неговата реакција беше неодамнешната прес-конференција на Мицкоски во Владата, на која, според Беџети, премиерот давал обвинителски квалификации за случајот со трагичниот настан во еден ноќен клуб.

Подоцна Беџети влезе во вербален дуел и со министерот Панче Тошковски откако го праша  кој го држел бизнисот на дискотеката „Пулс“ отворен со години, барајќи да поднесе оставка од  морални причини. На ова, одговори министерот.

„Мене ме прашувате?  Дел сте од политичката партија чии кадри управуваа со Министерството за економија 15-20 години. Колку години управуваа? Јас не паметам. Не паметам дали имало друг министер кој управувал со ова министерство освен кадри на ДУИ. И сега кој го држел отворен бизнисот со лиценците, мене ме прашувате? Кој го држел отворен бизнисот“, одговори Тошковски .

Тој рече дека народот гледа разлика и дека перцепцијата и логиката на ДУИ  не подразбираат дека на крајот некој треба да има вистинска одговорност.

„Во сите предмети во којшто изгореа и загинаа многу луѓе, немате процесуирано ни една петина од она што ние го процесиравме за трагедијата во Кочани. За вас секогаш кабелот е крив“ – рече Тошковски.