„Барби ботокс“: Хит естетска процедура која ги истенчува рамената и грбот

Светот на козметичките третмани постојано се развива, а најновата сензација која се шири низ социјалните мрежи и собира милиони прегледи е инспирирана од актуелен филмски хит. Авантурите на најпознатата кукла на светот уште пред почетокот на филмот „Барби“ силно влијаеле на трендовите во облеката, шминката и фризурите, но не застанале тука, па третманот со ботулински токсин А (ботокс), кој таргетира премногу силни мускули на горниот дел од грбот, е на бранот „Барби лудило“ наречен „Барби ботокс“, а пред тоа беше познат и како „трап токс“.

Според New Beauty, „Барби ботоксот“ го користи невротоксинот ботулински токсин А, надвор од она за што е регистриран (off label), со цел да ги релаксира прекумерно активните и згрчени мускули на трапезиус. Терминот „Барби ботокс“ е измислен затоа што под влијание на ботоксот рамената се опуштаат, што доведува до мало издолжување на вратот и потенок изглед на горниот дел од телото. Многу луѓе имаат затегнати мускули на рамената поради продолжената работа на компјутер и други активности кои создаваат напнатост во вратот и рамената, па спомнувањето на Барби во името на третманот може да ве одведе во погрешна насока – главната цел е лекувањето стегнат мускул на грбот, да не се разубавувате за да можете подобро да носите отворени кошули. И покрај тоа, името се одржа бидејќи третманот на некој начин ја поддржува естетиката на Барби.

За затегнати трапезоидни  мускули, првата линија на третман е вежбање и истегнување, како и подобрување на држењето на телото и промена на рутината. Меѓутоа, ако овие методи се покажат како неефикасни, поединците често се обраќаат кон невромодулатори кои се одобрени за таква употреба. Со вбризгување на ботокс, мускулите привремено се ослабуваат и се намалуваат контракциите, што ги опушта и издолжува мускулите. Поради ова, аголот помеѓу вратот и рамената се зголемува, а вратот визуелно станува потенок и подолг, давајќи целокупен поженствен и нежен изглед.

„Ако погледнете во куклата Барби, ќе видите дека таа има агол од 90 степени помеѓу вратот и рамената, за разлика од, да речеме, нинџа-желките“, изјави за New Beauty пластичниот хирург д-р Симона Полтер.

Ефектот на „Барби ботоксот“ е привремен, трае три до четири месеци и бара повторување доколку се сака да се одржи посакуваниот резултат. Редовната употреба на инјекциите ќе предизвика атрофија на мускулите поради неупотреба, потенцијално намалувајќи ја количината на ботокс потребна за понатамошни третмани. Д-р Полтер вели дека постапката е целосно реверзибилна, бидејќи откако ќе престане „ботоксот“, со редовна употреба мускулите се враќаат во првобитната големина.

„Како и секоја употреба на невромодулатори, така и оваа бара одржување. Но, како и со секој козметички третман, особено трендовски, заинтересираните за „Барби ботокс“ треба да контактираат со сертифициран естетски лекар за да разговараат за целите и потенцијалните ризици од процедурата“, потсетува д-р Полтер.

Иако оваа процедура може да биде иновативно и прифатливо решение за луѓето кои сакаат попрефинет изглед на горниот дел од телото, најважно е лекарот стручно да процени кој е кандидат за зафатот.