Бајден го критикува Трамп за „неверојатна неодговорност“

Новоизбраниот американски претседател Џо Бајден ја критикуваше „неверојатната неодговорност“ на Доналд Трамп, кој сепак одбива да го прифати резултатот од изборите на 3 ноември.

– Мислам дека (Американците) се сведоци на неверојатна неодговорност, крајно штетни пораки испратени до остатокот од светот за функционирањето на демократијата, изјави тој на прес-конференција во Вилмингтон.

– Убеден сум дека тој знае дека изгубил и дека јас ќе положам заклетва на 20 јануари, додаде Бајден.

– Она што тој го прави е скандалозно, рече демократот.

Во Вилмингтон, Делавер, Бајден истакна дека неговиот преоден тим ги нема сите потребни информации што треба да ги добие од разни агенции, па затоа „не сме во можност да се справиме со се, од тестирање до упатства за најважното прашање на дистрибуција на вакцините“.

Бајден покрена своја работна група фокусирана на создавање активен план за борба против пандемијата, но тој и неговите соработници велат дека неможноста за пристап до сегашното планирање во сојузната влада ќе го отежни одговорот на пандемијата кога Бајден ќе ја преземе функцијата во јануари.