Австралија до Трамп: Ако воведете царини за говедско месо, Мекдоналдс ќе ви ги зголеми цените

Трговската војна на Доналд Трамп може да ја зголеми цената на американските хамбургери, предупреди австралискиот министер за трговија, поради шпекулациите дека царините би можеле да се прошират на говедско месо и други земјоделски производи.

Австралискиот министер за трговија Дон Фарел рече дека поголемиот дел од австралиското говедско месо што се извезува во САД завршува во Мекдоналдс и дека секоја нова царина за австралиските стоки неизбежно ќе ја зголеми цената што Американците ја плаќаат за своите хамбургери.

Тој најави дека ќе продолжи да притиска Австралија да биде ослободена од царините. „Би сакал да можам да ви кажам што точно американската влада конечно ќе направи. Да бидам искрен со вас, мислам дека тие дури и не знаат“, изјави Фарел за Sky News.

Австралиската влада најави дека ќе продолжи со аргументи да ги критикува американските царини од 25 отсто за увоз на челик и алуминиум. Австралиските фармери нестрпливо чекаат да слушнат дали извозот на месо ќе биде погоден од следната рунда царини.

Премиерот Ентони Албанес истакна дека американските царини против Австралија не се чин на пријателска нација. „Имаме големи пријатели во Соединетите држави и очекуваме тие да се однесуваат соодветно. Тарифите не се данок за производителот, тие се данок за американскиот народ. Видовме дека пазарите реагираат многу негативно на овие потези на администрацијата на Трамп“, рече тој.

Фарел тврди дека Австралија нема да размисли за одмазднички тарифи за Америка. „Дел од мојата работа е да продолжам да им кажувам на Американците дека усвоиле погрешни политики. Всушност, ние треба да го правиме спротивното. Треба да создадеме повеќе слободна трговија, повеќе фер трговија, а не помалку трговија“, истакна тој.

Соединетите Американски Држави се меѓународен пазар број еден за австралиското говедско, јагнешко и козјо месо. Австралиските производители продадоа месо во САД во вредност од 6,2 милијарди долари минатата година. Запрашан за можните царини за земјоделски производи како говедско месо, Фарел верува дека таквата промена „ќе има значително влијание“ и врз австралиските производители и врз американските потрошувачи.

„Значењето за САД за нашиот извоз на говедско месо е тоа што најголемиот дел од него оди во хамбургерите на Мекдоналдс. Ако ја зголемите цената на тој извоз на говедско месо за 25% или 10% или каква и да е бројката, тогаш само ќе ја зголемите цената на хамбургерите во САД. Нема смисла“, заклучи тој.