Арапско-исламски самит: Израелскиот напад врз Газа не смее да се нарече самоодбрана

Учесниците на арапско-исламскиот самит, кој во сабота се одржува во Саудиска Арабија, повикаа на прекин на војната во Газа, отфрлајќи ја можноста за какво било оправдување за израелските акции преземени против Палестинците како самоодбрана.

На самитот се осуди „израелската агресија врз Појасот Газа, воените злосторства, како и варварските и нехумани масакри извршени од окупаторската сила“, се вели во завршната изјава.

Во декларацијата се повикува на прекин на опсадата на Газа, се повикуваат властите да овозможат испорака на хуманитарна помош во енклавата и да го запрат извозот на оружје за Израел.

На барање на Палестинците и Саудиска Арабија, лидерите на 22 земји од Арапската лига и муслимански земји се собраа во Ријад, каде за првпат пристигна иранскиот претседател Ебрахим Раиси и ги повика муслиманските земји да ја прогласат израелската армија за „терористичка организација“.

И земјата домаќин Саудиска Арабија и муслиманските земји повикаа на итен прекин на воените операции во Газа и го наведоа Израел одговорен за „злосторства“ против Палестинците.

Одредени земји, како Алжир и Либан, предложија прекин на економските и дипломатските односи со Израел и суспендирање на испораката на нафта за Израел и неговите сојузници, според дипломатите.

Ваквиот предлог беше отфрлен од најмалку три земји, вклучувајќи ги Обединетите Арапски Емирати и Бахреин, кои ги нормализираа односите со Израел во 2020 година.

Саудиска Арабија, која одржува блиски врски со САД и пред 7 октомври презеде чекори за нормализирање на односите со Израел, стравува дека може да стане цел.

Израел и неговиот главен сојузник, САД, досега ги отфрлаа повиците за прекин на огнот во Газа.

Ердоган: Не ни требаат паузи, туку траен прекин на огнот
Турскиот претседател Таип Ердоган во саботата изјави дека треба да се свика меѓународна мировна конференција за да се најде трајно решение за конфликтот меѓу Израел и Палестинците.

„Не ни требаат неколкучасовни паузи во Газа, туку ни треба траен прекин на огнот“, рече Ердоган во обраќањето на вонредниот самит во Ријад.

Хамас ги повика учесниците на самитот „да донесат историска и конечна одлука за итно запирање на ционистичката агресија“.

„Ги повикавме арапските и муслиманските лидери… да извршат притисок врз американската администрација која сноси директна одговорност за геноцидната војна против нашиот народ во Појасот Газа“, се вели во соопштението на палестинската милитантна група Хамас.

Геноцидот го спомена и претседателот на палестинската управа, Махмуд Абас, кој е на власт на Западниот Брег со покана. Абас рече дека против Палестинците се води „геноцидна војна“ и ги повика САД и Израел да ја прекинат агресијата.

Војната во Газа започна на 7 октомври кога палестинското исламистичко движење Хамас, кое е на власт во Газа, ја нападна израелската територија и уби околу 1.200 Израелци, главно цивили, и зеде 200 израелски заложници.

Катарскиот емир Шеик Тамим бин Хамад Ал Тани изјави дека Катар вложува големи напори да преговара за ослободување на израелските заложници во Газа, но и го предупреди Израел да не се однесува како „разгалено дете“.

„Меѓународната заедница не успеа да ги исполни своите законски и етички одговорности“, рече шеикот Тамим за време на заедничкиот исламско-арапски самит посветен на Газа во саудискиот главен град Ријад. „До кога меѓународната заедница ќе го третира Израел како да е над меѓународните закони“, праша катарскиот шеик.