Во Македонија 69 отсто се за членство во ЕУ: Анкета на Евробарометар

Најновата анкета на Европската унија покажува дека мнозинството граѓани на ЕУ го поддржуваат понатамошното проширување. Меѓу земјите-кандидатки, поддршката за пристапување во ЕУ во Македонија е 69 отсто.

Новообјавената анкета на Евробарометар покажува дека 56 проценти од граѓаните на ЕУ се за понатамошно проширување на Унијата.

Поддршката е особено висока кај младите: околу две третини од испитаниците на возраст од 15 до 39 години веруваат дека (потенцијалните) кандидати треба да се приклучат на ЕУ кога ќе ги исполнат потребните услови, според анкета објавена на веб-страницата на Европската комисија.

Мнозинството (56 проценти) исто така веруваат, како што се наведува, дека нивната земја би имала корист од идното проширување. Најчесто препознаените предности се посилно глобално влијание, поголем пазар за компаниите од ЕУ, повеќе можности за вработување, како и поголема солидарност и безбедност.

Важно е да се напомене дека, според веб-страницата на Комисијата, 67 проценти од граѓаните велат дека не се доволно информирани за проширувањето.

Дополнително, како што е наведено, анкети за перцепција се спроведени во Албанија, Босна и Херцеговина, Косово, Грузија, Молдавија, Црна Гора, Македонија, Србија и Украина.

Анкетата покажува целокупна поддршка за пристапување во ЕУ во Западен Балкан, со исклучок на Србија.

Поддршката за пристапување во ЕУ е особено висока во Албанија (91 процент) и Македонија (69 проценти), каде што граѓаните очекуваат придобивки како што се подобрен квалитет на живот и отворени граници. Спротивно на тоа, Србија бележи најниска поддршка за членство во ЕУ во регионот, само 33 проценти. Во Источното соседство, земјите-кандидатки Грузија и Украина се предводници со 74 проценти и 68 проценти поддршка за членство во ЕУ, соодветно. Генерално, ентузијазмот за пристапување во ЕУ е силен, но во исто време е под влијание на специфичните економски и геополитички околности на секоја земја.

Најголема поддршка за проширување на ЕУ има во Шведска – 79 отсто, и Данска 75 проценти. Потоа следат Литванија, Финска, Полска. На последните две места се Чешка и Франција со поддршка за проширувањето од 43 отсто.

Ниското ниво на информации за Европската унија и политиката на проширување претставува заеднички предизвик во сите земји-кандидатки и потенцијални кандидати, при што значителен дел од граѓаните веруваат дека не се добро информирани. Само 48 проценти од граѓаните во Молдавија и 39 проценти во Црна Гора се чувствуваат добро или многу добро информирани, додека тој процент паѓа на 23 проценти во Украина и само 20 проценти во Србија.