Анчелоти отфрли договор со шпанските обвинители

 Тренерот на Реал Мадрид, Карло Анчелоти одби да се согласи на договор со шпанските обвинители во случајот за затајување данок, пишува „Мундо Депортиво“.

На Анчелоти му се заканува затворска казна од пет години. Тој е обвинет за затајување данок во 2014 и 2015 година. 

Денес 65-годишниот фудбалски стручњак се појави на суд и рече дека е подготвен да сведочи и одби договор со обвинителството.

Тренерот на Реал Мадрид (65) пристигна во Провинцискиот суд во Мадрид во средата пред да седне на обвинителната клупа.

Тој беше обвинет за намерно дезинформирање на даночната управа за време на неговиот прв мандат на чело на Реал во периодот од 2014 до 2015 година за да избегне плаќање данок на доход над милион евра.

Анчелоти негира дека сторил нешто лошо и вети дека ќе се бори против обвиненијата. Неговото појавување пред судот се случи само неколку часа по драматичниот натпревар против Реал Сосиедад (4:4) во кој неговиот тим со гол во 115. минута го освои финалето на Копа дел Реј.

Италијанскиот менаџер, најодликуваниот во историјата на Лигата на шампионите со пет титули како тренер и две како играч, призна дека платил помалку данок во 2014 година бидејќи тоа било „грешка на неговите сметководители“, но и дека во 2015 година не прекршил ниту еден закон затоа што не поминал 183 дена во Шпанија, што е неопходно за да мора да плати данок.

Сепак, обвинителите тврдат дека главниот извор на приходи на Анчелоти во овој период бил токму Реал бидејќи тој се уште го немал преземено Баерн Минхен.

Обвинителите побараа четири години затвор за Анчелоти доколку биде прогласен за виновен за обвиненијата што се покренати против него. Анчелоти истакна дека е „убеден дека е невин“.

„Ова е стара приказна. Обвинителството смета дека сум бил жител на Мадрид во 2015 година, а верувам дека не сум бил. Казната е платена, а случајот е во рацете на моите адвокати“, изјави тренерот на Реал Мадрид пред почетокот на судењето.

Анчелоти е на чело на Реал Мадрид од летото 2021. Пред тоа работеше во мадридскиот клуб од 2013 до 2015. 

Италијанецот во текот на својата богата тренерска кариера ги предводеше и Евертон, Наполи, Баерн, ПСЖ, Челзи, Милан, Јувентус и Парма.

По 29 кола, Реал Мадрид е втор во Примера со 63 бода, со три бода помалку од лидерот Барселона.