Америка очекува Русија да ја нападне Украина во февруари, кога ќе замрзне земјата

Белата куќа соопшти дека претседателот Џо Бајден го предупредил украинскиот претседател во четвртокот дека постои „изразита можност“ Русија да преземе воена акција против Украина во февруари. Кремљ исто така се огласи со мрачна нота, велејќи дека гледа „малку основа за оптимизам“ во решавањето на кризата откако САД оваа недела повторно ги отфрлија главните барања на Русија.

Руските власти рекоа дека сѐ уште е можен дијалог за да се стави крај на кризата, но Бајден повторно понуди остро предупредување поради зголемената загриженост дека рускиот претседател Владимир Путин ќе даде зелено светло за натамошна инвазија на украинска територија во не толку далечна иднина.

Белата куќа соопшти дека коментарите на Бајден до Украинецот Володимир Зеленски во телефонски разговор ја засилиле загриженоста што претставниците на администрацијата ја изразуваат веќе некое време.

Но, како што се очекуваше, САД и западната алијанса во средата цврсто отфрлија какви било отстапки за главните барања на Москва. Соединетите Држави ги наведоа областите во кои може да се решат некои од грижите на Русија, нудејќи пат кон деескалација. Но, како што правеше постојано во изминатите неколку недели, Вашингтон, исто така, ја предупреди Москва на разорни санкции доколку ја нападне Украина. Покрај казните насочени кон рускиот народ и клучните економски сектори, неколку високи американски претставници во четвртокот со сигурност рекоа дека Германија нема да дозволи новоизградениот гасовод да започне со работа во случај на упад.

Сите очи сега се насочени кон Путин, кој ќе одлучи како Русија ќе одговори поради стравувањата дека Европа повторно би можела да биде втурната во војна.

Во меѓувреме, Бајден разговараше со својот украински колега Зеленски во четвртокот за да ја повтори американската и сојузничката поддршка, вклучително и неодамнешните испораки на американска воена помош.

Бајден го предупредил Зеленски дека САД веруваат оти постои голем степен на веројатност Русија да изврши инвазија кога земјата ќе замрзне и руските сили би можеле да ја нападнат украинската територија од северот на Киев, според две лица запознаени со разговорот кои не биле овластени јавно да коментираат.

Воени експерти велат дека Русија можеби чека оптимални копнени услови за да пренесе тешка опрема во Киев како дел од каква било инвазија. Пред осум години, Русија изврши инвазија на украинскиот полуостров Крим кон крајот на февруари.

Зеленски на Твитер напиша дека тој и Бајден разговарале и за можноста за дополнителна финансиска поддршка за Украина.

Белата куќа соопшти дека Бајден му рекол на Зеленски дека „истражува дополнителна макроекономска поддршка за да ѝ помогне на економијата на Украина“, бидејќи таа е под притисок како резултат на военото засилување на Русија.

Во меѓувреме, Соединетите Држави објавија дека Советот за безбедност на ОН во понеделник ќе одржи отворен состанок за, како што го нарече американската амбасадорка Линда Томас-Гринфилд, руското „заканувачки однесување“. Таа рече дека распоредувањето на повеќе од 100.000 војници долж границата со Украина и другите дестабилизирачки акти претставуваат „јасна закана за меѓународниот мир и безбедност и Повелбата на ОН“.

Портпаролот на Кремљ, Дмитриј Песков, претходно им рече на новинарите дека одговорот од САД – и сличен од НАТО – остави „малку терен за оптимизам“. Но, тој додаде дека „секогаш има изгледи за продолжување на дијалогот, тоа е во интерес и на нас и на Американците“.

Прес секретарот на Белата куќа Џен Псаки беше внимателна кога беше прашана дали администрацијата на Бајден видела трошка надеж во тоа што Русите рекоа дека ќе ги одржат отворените комуникациите иако рекоа дека им недостига оптимизам.

„Не знаеме дали Русите играат игри на дипломатија. Се надеваме дека нема“, рече Псаки.

Министерот за надворешни работи Сергеј Лавров рече дека одговорот на САД содржи некои елементи кои би можеле да доведат до „почеток на сериозен разговор за секундарни прашања“, но нагласи дека „документот не содржи позитивен одговор за главното прашање“. Тоа се барањата на Москва НАТО да не се шири и алијансата да се воздржи од распоредување оружје што може да ја загрози Русија.

Украинскиот министер за надворешни работи Дмитро Кулеба рече дека Киев го видел одговорот на САД пред да и биде доставен на Русија и дека немал никакви забелешки. Тој на Твитер напиша дека е „важно САД да останат во близок контакт со Украина пред и по сите контакти со Русија“.

За време на посетата на Данска, Кулеба ја истакна потребата на неговата земја да ја зајакне својата одбрана.

„Оваа криза е момент на вистината и затоа зборуваме за оружје“, рече тој. „Затоа зборуваме за економски санкции. Затоа зборуваме за консолидираната позиција на сите нас, за претседателот Путин да види дека нема слаби алки во нашиот одбранбен синџир“.

Германската министерка за надворешни работи Аналена Бербок за време на парламентарната дебата за Украина рече дека нејзината влада тесно ја координира својата политика со сојузниците, разгледувајќи низа опции кои би можеле да го вклучат новиот руски гасовод „Северен тек 2“ до Германија.

Како што се зголемуваа стравувањата од војната, илјадници Украинци ја изразија својата решеност да се спротивстават на рускиот притисок под хаштагот #UkrainiansWillResist на Твитер и Фејсбук.

„Никој нема да ги принуди Украинците да го прифатат ултиматумот на Кремљ“, напиша Андриј Левус, кој ја иницираше кампањата. (АП)