Ален Делон, легендата на францускиот филм, почина на 88 години

Ален Делон, францускиот актер, продуцент и писател чија кул, загадочна убавина го направи меѓународен секс симбол, почина на 88-годишна возраст.

„Тој почина мирно во својот дом во Души, опкружен со неговите три деца и неговото семејство“, се вели во семејното соопштение објавено за новинската агенција АФП. Делон се бореше со лошо здравје во последниве години.

Роден во Ско, предградие јужно од Париз, Делон имаше турбулентно детство обележано со разводот на неговите родители и честите протерувања од училиште, пред да служи во француските маринци во Индокина. Своето прво појавување на филм го имаше во 1957 година, глумејќи платен убиец во трилерот „Quand la femme s’en mêle“, на англиски насловен „Испрати жена кога ѓаволот нема да  успее“.

Ова требаше да биде првата од многуте анти-херојски улоги за Делон, кој стана главна фигура во европскиот филм во 1960-тите, работејќи со такви пофалени режисери како Рене Клемент („Plein Soleil“, 1960 година, насловен „Purple Noon “ во Соединетите Американски Држави), Лучино Висконти („Роко и неговите браќа“, 1960 година и „Леопардот“, 1963 година) и Жан-Пјер Мелвил („Самураи“, 1967 година).

Во 1968 година, Делон беше фатен во скандал со секс, дрога и убиства во француското високо општество, познат како афера Марковиќ. Тој беше испрашуван, но никогаш не беше обвинет.

Тој, исто така, се појави во многу продукции на англиски јазик, вклучувајќи го антологискиот филм „Жолтиот Ролс-Ројс“ (1964) и вестерните „Тексас преку реката“ (1966) и „Црвеното сонце“ (1971), но не успеа да го реплицира успехот што го уживаше во европската кинематографија.

Делон во 1985 година ја доби наградата Цезар, француски еквивалент на Оскар, за најдобар актер за улогата на алкохоличар во „Нашата приказна“ на Бертранд Блиер. Тој беше номиниран и за Златен глобус за неговата изведба како страсниот без пари  Танкреди во „Леопардот“.

Неговата ѕвезда избледе во неговите подоцнежни години, но тој повторно се појави на телевизија околу почетокот на векот, играјќи детективи-ветерани во две мини-серии: „Фабио Монтале“ (2002) и „Френк Рива“ (2003-04).

Во 2005 година, Делон беше прогласен за офицер во француската Легија на честа за неговиот придонес во светската кинематографија.

Тој беше во брак со актерката и модел Натали Делон од 1964 до 1969 година и парот имаше едно дете, Ентони.Делон имаше уште три деца: синот Кристијан Булоњ со пејачот и актерката Нико, а Анучка Делон и Ален-Фабиен Делон со холандската актерка Розали ван Бримен.

Во една прилика откри дека славата го изморила бидејќи не можел да живее како другите луѓе и да ја има својата приватност. Рече дека црпел мотив од жените да бидe тоа што е, а се забавувал со најубавите жени на светот. Роми Шнајдер, Миреј Дарк, Натали Делон и Розали ван Бремен се само дел од убавиците со кои се забавувал.

Делон соработувал со многу големи имиња од светската кинематографија. Неговата филмска кариера опфаќа повеќе од шест децении и над 80 филмски наслови, а многу од неговите филмови се сметаат за класици на светската кинематографија. Покрај глумата, Делон се испроба и во филмска продукција и режија, но во текот на 1980-тите и 1990-тите полека почна да се повлекува од светот на филмот.

Иако често беше во центарот на вниманието поради приватниот живот, романсите и повремените контроверзи, Ален Делон секогаш беше симбол на стил, елеганција и вистински кинематографски гламур.

– Подготвен сум да умрам. Го мразам времето во кое живееме, ми се гади. Има луѓе што ги мразам. Сè е лажно, само парите се важни. Ќе заминам од овој свет без трошка жалење – изјави Делон во 2018 година за магазинот „Paris Match“ и откри дека неговата последна желба била неговото куче Лобо да замине со него на другиот свет.

– „Ако „одам“ пред него, ќе побарам од ветеринарот да ни дозволи да одиме заедно. Ќе му дадат инекција и ќе може да умре во моите раце. Подобро така отколку да умре од тага на мојот гроб – изјави актерот кој призна од што најмногу се плаши

Делон исто така бил преплашен од можноста по неговата смрт некој да го ископа за да земе ДНК за да утврди татковство.

– Ѝ реков на ќерка ми: Те молам, не дозволувај ова да се случи кога ќе умрам – изјавил  тој во една прилика.