„Ако треба, ќе го преместам Велебит“; 19 ученици повторија година во медицинското училиште во Задар
Ден пред да заврши наставата, родители нелегално влегоа во медицинското училиште во Задар, Хрватска, насилно, кршејќи ги сите протоколи, затоа што дури 19 ученици повторуваат година.
Во Медицинското училиште „Анте Кузманиќ“ во Задар, 19 ученици не ја завршија успешно оваа учебна година, од кои дури 15 ученици од прва година „не успеаја да положат со преодна оценка“. Незадоволните родители реагираа бурно, а ситуацијата ескалираше до тој степен што директорката Анита Басиоли беше принудена да побара помош од полицијата, пишува Zadarski.hr.
– Имавме сериозни ситуации со родителите, што ги пријавив во задарската полиција – потврди директорката. Според неа, инцидентите се случиле на самиот крај од учебната година.
– Ден пред да заврши наставата, родители нелегално влегоа во училиштето, насилно, кршејќи ги сите протоколи. Следниот ден се случи истото, па ја повикав полицијата да нè заштити – рече директорката. Еден од родителите, истакнува таа, не можеше да прифати дека неговото дете не успева во ниту една оценка.
– Цела година предупредувавме – детето не може да го направи тоа, тешко ѝ е. Сега не успеа и повторува. Една мајка драматично објави дека ќе го „премести Велебит“ за да може нејзиното дете да го помине одделението. Таа не го премести Велебит, но ги користи сите можни средства за да ја подобри ситуацијата. Ги разбирам како родител, јас самата сум мајка, но никогаш не би го оправдала ова однесување – изјави таа, нагласувајќи дека ова е втор ваков инцидент за време на нејзиниот мандат.
– Најчесто станува збор за „моќни родители“ кои вршат притисок врз мене и наставниците – вели Басиоли, како што објави Zadarski.hr.
Оваа година во училиштето учеле 391 ученик, а некои родители побарале надзор откако било објавено колкју ученици ќе ја повтроуваат годината.
– Инспекцијата не откри никакви неправилности – рече Басиоли, јасно испраќајќи порака дека училиштето не може да биде задоволно кога станува збор за знаењето, затоа што се работи за идни здравствени работници.
– Не сакаме медицинските сестри да не знаат како да направат сооднос на инфузија. Училиштето не е лесно – и не треба да биде. Овие луѓе утре ќе ги држат нашите животи во свои раце. Не можеме да си играме со тоа – рече таа.
Укинување на прагот
Таа го наведува укинувањето на минималниот праг на бодови за запишување како главна причина за големиот број неуспеси поради големата потреба од медицински сестри.
– Запишавме четири паралелки без праг на бодови. Последниот ученик имаше 48 поени. Првичните испити покажаа дека некои ученици едноставно немале основно знаење – имале од 0 до максимум 23 проценти од одговорите. На почетокот на годината знаевме дека ќе има проблеми. Учениците доаѓаа од училишта каде што имаа двојки по математика, хемија и физика – клучни предмети за нашата професија. И покрај напорите на училиштето, 15 ученици од прва година не успеаја да го совладаат материјалот. Се обидовме да соработуваме со родителите, но некои едноставно не сакаа да разговараат – опиша таа.
Поради негативното искуство, училиштето одлучи да го врати минималниот праг на поени за прием на програмата за медицински сестри и техничари за општа нега – сега е потребен минимум 56 поени. Максималниот број поени врз основа на оценките за четиригодишните стручни училишта е 80.
– Искрено го слушавме пазарот на трудот и си направивме лоша услуга. Притисоците се големи, но нема да дозволам квантитетот да го деградира квалитетот – рече директорката на Медицинското училиште во Задар.
15 паралелки
Покрај медицинските сестри, училиштето запишува и ученици на програмите за медицински лаборанти техничари и забни асистенти, за кои сè уште нема праг на поени.
– Нема медицински лаборантски техничари, болниците плачат за нив. Последниот што матурираше од нашето училиште беше пред 10 години. Лаборантите се професија за која Општата болница во Задар плаче, и во договор со нив, ги запишуваме бидејќи ги нема. Тие исто така бараат акушерки. Ќе морам да го намалам бројот на медицински сестри, колку и да е непопуларна мерката, бидејќи во Задарската жупанија има недостиг од над 80 од нив, но училиштето нема капацитет за сите ученици и струки, додава директорката.