Грчкиот неофашизам е во подем – „Златна зора“ најавува политички „земјотрес“

 Главните грчки политички партии во Грција повеќе не можат да го игнорираат подемот на неофашистите и да се прават изненадени на денот на изборите, изјави за Rapporteur експерт за јавно мислење и политички аналитичар.

Во пресрет на изборите во Грција, кои ќе се одржат на почетокот на следната година, се очекува враќањето на поранешниот истакнат член на „Златна зора“, Илијас Касидиарис, да ја раздрма политичката сцена.

Касидиарис беше пуштен на слобода минатиот месец, откако отслужи речиси седум години од казната од 13 и пол години затвор. Тој беше осуден поради неговата водечка улога во неофашистичката партија, чии членови во 2013 година убија еден антифашистички музичар.Тој сега ги тестира законските одредби што му овозможуваат на Врховниот суд на Грција да забрани партии чие раководство или политичка насока се поврзани со лица осудени за тешки кривични дела.

Стотици поддржувачи присуствуваа на говорот што тој го одржа во средата во Солун – настан што самиот го опиша како „политички земјотрес“.

„Доаѓаме, и ние сме политичката сила во подем“, рече тој.

Опозициските партии го осудија собирот. „Одвратен собир на омраза и нетолеранција – нулта толеранција за неонацизмот“, изјави Костас Цукалас, портпарол на социјалистичката партија ПАСОК.

Сепак, според Јоргос Трапалис, политички аналитичар и раководител за истражувања во агенцијата за испитување на јавното мислење „Good Affairs“, ова не е правилниот пристап.

„Грчките партии мора да ја прифатат реалноста, наместо да замижуваат пред неа и да се однесуваат како тоа да е некакво изненадување на денот на изборите“, изјави тој за Rapporteur. Трапалис изјави дека низ Европа постои „огромен слон во собата“, но политичките партии, навидум, се задоволни да се преправаат дека се шокирани на денот на изборите, бидејќи тоа им одговара.

„Традиционалните партии не успеаја да најдат решенија за проблемите со кои се соочуваат работните луѓе, особено за станбената криза и миграцијата“, рече тој.

„Ако сакате да одите на пливање на 22 ноември, а метеорологот ви каже дека ќе врне, не е виновен метеорологот што врне. Вие сте виновни што сте сакале да се сончате.“

Официјалните анкети не го вклучуваат Касидиарис. Сепак, Трапалис изјави дека, без оглед на тоа дали тој ќе успее да учествува на изборите или не, гласачкото тело за неговото политичко движење постои, при што се предвидува поддршката да надмине 5% – што е над прагот од 3% потребен за освојување пратеничко место во грчкиот Парламент.

Трапалис рече дека опозициското дејствување не треба да биде насочено кон самата крајнодесничарска идеологија, туку кон злосторствата што произлегуваат од неа.

„Касидиарис тврди дека бил затворен поради своите идеи, но мора јасно да се каже дека тој припаѓал на организација што убивала луѓе“, изјави Трапалис.

Повикувајќи се на истражување тој наведе дека една третина од младите веруваат оти нелибералната десница може да ги реши нивните проблеми.

„Ако некому му се залепи етикетата ’крајнодесничар‘, тоа може да делува провокативно и модерно“, рече тој.

Трапалис објасни дека свртувањето кон пошироката десница доаѓа од гласачи од работничката класа, кои традиционално ја поддржувале социјалдемократијата, како и од конзервативни гласачи кои чувствуваат дека ја изгубиле својата сигурност. Тој додаде дека левицата од главниот политички тек повеќе не може да понуди решенија и дека научила вината да ја префрла врз другите. Партијата на Алексис Ципрас, „Грчка лева алијанса“, се натпреварува со социјалистичкиот ПАСОК за второто место на претстојните избори.

„И едните и другите не успеаја да го препознаат заедничкиот непријател. Со години, тие ја губат од вид својата цел – да допрат до луѓето од пошироката работничка класа.“

Грција ќе одржи парламентарни избори во пролетта 2027 година. Висок владин претставник во септември изјави за „Рапортер“ (Rapporteur) дека 16 мај е веројатен датум.