Трамп подготвен за средба со Путин и Шји Џјинпинг, вели дека некој друг треба да преговара во име на Украина
Американскиот претседател, Доналд Трамп, изјави дека е подготвен да учествува на трилатерална средба со рускиот претседател Владимир Путин и кинескиот претседател Шји Џјинпинг, како и дека смета оти е време некој друг да преговара во име на Украина.
Главна тема на разговорите што би можеле да се одржат следниот месец во Кина, на маргините на самитот на Азиско-тихоокеанската економска соработка (АПЕК), би биле нуклеарното оружје и нуклеарното разоружување.
„Би разговарале за нуклеарното оружје и нуклеарното разоружување. Ако претседателот Шји сака да се одржи средбата, би учествувал“, им изјави Трамп на новинарите пред Белата куќа.
Кремљ претходно соопшти дека била разгледана можноста тројцата лидери да се сретнат на маргините на претстојниот самит на АПЕК во Кина.
Весникот „Волстрит џурнал“ претходно објави дека Путин ја покренал идејата за таква средба во рамките на напорите за завршување на војната во Украина.
На прашањето дали би бил подготвен да преговара за завршување на војната без присуство на украинскиот претседател Володимир Зеленски, Трамп одговори дека е подготвен да направи сè што може за да се стави крај на конфликтот, без оглед на присуството на украинскиот лидер.
„Мислам дека е време некој друг да преговара во име на Украина“, рече Трамп, додавајќи дека можеби е време Зеленски да ѝ ја препушти таа улога на друга личност.