Србија пред избори: Формирана е граѓанска група „Студентска листа – Студентите победуваат“ и 14 потписници

Студентите во блокада најавија дека е формирана група граѓани „Студентска листа– Студентите победуваат“ за вонредните парламентарни избори во Србија што ќе се одржат на 25 октомври.

На листата има 14 потписници.

„Претстојните избори поставуваат само едно прашање: Србија или мафијата. Со заеднички поздрав „Студентите победуваат“, напишаа студентите.

Тие додадоа:

„Кога стана јасно дека институциите повеќе немаат волја или легитимитет да им служат на граѓаните, студентите одлучија да ја преземат одговорноста за иднината на оваа земја. Препознавме дека распишувањето вонредни парламентарни избори е алатка што може да постигне сè што баравме од самиот почеток, бидејќи институциите што ја изгубиле довербата на народот не можат да останат чувари на неговата судбина“.

Тие изјавија дека напишале „детална и сериозна социјална програма“ и дека, како што тврдат, избрале професионални луѓе да го претставуваат движењето на изборната листа.

Потписниците за формирање на групата граѓани ќе бидат на изборната листа на студентското движење, изјави вечерва за ФоНет еден од нив, Горан Перишиќ.

Според Перишиќ, групата на граѓани е формирана со цел да се организира собирањето потписи за учество на претстојните вонредни парламентарни избори.

Тој изјави дека собирањето на потребните 10.000 потписи би можело да започне штом Републичката изборна комисија ги објави потребните формулари, што се очекува утре или задутре.

Според Перишиќ, листата со имиња би можела да биде позната до крајот на оваа или почетокот на следната недела.

Утре во Нови Сад, студентите ќе организираат состанок со кој, како што рекоа, ќе ја започнат кампањата за вонредните парламентарни избори на 25 октомври.