Строги правила за утрешниот концерт на „Крафтверк“ во Скопје
Роботската германска четворка „Крафтверк“ утревечер ќе настапи во Скопје во ВИП Арената „Борис Трајковски“. Настапот е во рамките на нивната европска турнеја, а со овој настан се одбележува и дводецениското постоење на фестивалот Таксират.
Пионирите на електронската музика гостуваат во Скопје по 13 години од нивниот прв настап кај нас, кој сѐ уште важи за еден од најдобрите концерти кои било кога се одржале во Македонија, а овој пат ексклузивноста на нивното гостување е збогатена и со спектакуларното 3-Д визуелно шоу кое е дел од нивните концерти на исклучително успешната актуелна турнеја.
„За таа цел, секој од посетителите, при влезот на концертот ќе добие и брендирани 3-Д очила. „Крафтверк“ доаѓаат во Скопје со огромен тим кој ќе се погрижи овој концерт да биде доведен до перфекција и кој работи на комплетната техничка и продукциска реализација на секој од концертите во нивната турнеја. Вратите на арената ќе бидат отворени за посетителите од 19:00 часот, а почетокот на концертот е точно во 20:30 часот. Поради големиот број на посетители и со цел да се избегнат гужвите, за време на концертот во арената „Борис Трајковски“ во функција ќе бидат повеќе влезови: главен влез (југ), ВИП влез (запад – од страна на лизгалиштето) и страничен влез (исток – од страна на базенот)“, соопштуваат од Пасворд продукција, организатори на концертот.
Сите оние кои своите билети ги купиле онлајн се известуваат дека нема да се врши замена на ваучерите за билети, туку задолжително треба да ги испечатат електронските ваучери (PDF документот во нивниот и-мејл) и да ги приложат при влез на концертот заедно со документ за лична идентификација. Оние онлајн купувачи пак кои сепак преферираат да имаат класичен билет за нивните колекционерски потреби, ќе можат да ја направат оваа замена веднаш по завршувањето на концертот, на билетарницата во арената „Борис Трајковски“.
„При влегувањето на концерт сите посетители ќе се претресуваат за проверка на предметите кои тие ги внесуваат. Во концертната сала, покрај храна и пијалоци како и вообичаено забранетите предмети, не смее да се внесува професионална и полупрофесионална аудио и видео опрема за снимање и пренос на концертот, што вклучува камери и фотоапарати со кои може да се користи објектив. На посетителите на концертот на располагање им е и паркингот на Вип Арена „Борис Трајковски“ но поради неговиот лимитиран капацитет и големиот број на посетители, а со цел да се избегне гужвата, наша препорака е да го користите јавниот превоз или околните паркинзи за возилата. Сите заинтересирани посетители кои сѐ уште не ги набавиле своите влезници за концертот на „Крафтверк“ ги известуваме дека фан-пит и партер билетите се целосно распродадени, а преостанатите билети за трибините, можете да ги купите преку продажната мрежа на МКтикетс или онлајн на овој линк“, велат од Пасворд продукција.