Косово ги зголеми таксите за увоз на српски производи за 100 отсто

Владата на Косово одлучи попладнево да ги зголеми таксите на производите кои се увезуваат од Србија за 100 отсто, јави дописникот на МИА од Приштина.

Еден ден по неуспешниот обид на Косово за зачленување во Интерпол, на предлог на косовскиот министер за трговија Ендрит Шаља, Владата на Рамуш Харадинај одлучи да ги зголеми за 100 отсто таксите, кои пред две недели беа покачени за 10 проценти.

– Од денеска се воспоставува мерката од 100 отсто такса на производите со потекло од Србија, изјави Шаља на владината седница.

Премиерот Харадинај соопшти дека одлуката стапува во сила веднаш и им наложи на надлежните институции веднаш да почнат да ја спроведуваат.

Како и при првото зголемување на таксите за 10 отсто, образложението на Владата во Приштина е дека таквиот чекор се презема „поради дивата кампања на Белград против косовската државност и попречувањето на зачленувањето на Косово во меѓународните организации“.

Во првите реакции на ваквата одлука во Приштина се вели дека со ова Косово и објави „економска војна“ на Србија.

Ваква и слични мерки, по вчерашниот исход на гласањето за прием на Косово во Интерпол, јавно побараа повеќе албански јавни личности и политичари во Косово, како од власта, така и од опозицијата.