Тачи добил поддршка од Помпео и Пелоси за постигнување конечен договор со Србија

Претседателот на Косово Хашим Тачи, кој престојува во Вашингтон за Молитвениот појадок во организација на американскиот претседател Доналд Трамп, соопшти дека се сретнал со државниот секретар на САД, Мајк Помпео и со претседателката на Претставничкиот дом, Ненси Пелоси и дека од двајцата добил поддршка за постигнување договор со Србија.

Тачи информацијата ја соопшти преку својот профил на Фејсбук, каде што објави и фотографии од средбите со Помпео и Пелоси.

– Како и секогаш, посебно задоволство е да се разговара со државниот секретар на САД, Мајк Помпео. И денеска, на Молитвениот појадок, разговаравме за развојот на настаните во Косово и во регионот на Западен Балкан. Уште еднаш се потврди целосната поддршка од САД за дијалогот и за постигнување сеопфатен и конечен договор меѓу Косово и Србија, напиша Тачи.

Слична објава, дваесетина минути подоцна, косовскиот претседател имаше и за средбата што ја имал со спикерката на Претставничкиот дом, која, за разлика од Помпео, кој е републиканец, доаѓа од редовите на Демократската партија.

– Ненси Пелоси е стара пријателка на Косово и за тоа и изразив признание за време на Молитвениот појадок. Во Вашингтон, кога е во прашање Косово, сите говорат со еден глас во поддршка на мировниот договор, напиша Тачи покрај сликата со Пелоси.

Тачи, министерот за надворешни работи Беџет Пацоли и неколку пратеници во Собранието на Косово учествуваат на годинешниот молитвен појадок во Вашингтон, кој традиционално се одржува првиот четврток во месец февруари.