Ревма – сериозно заболување кое бара правилен третман

Ве „вртат“ зглобовите на рацете или нозете? Ве болат, особено кога се менува времето? Одите на лекар или чекате болките да поминат сами од себе?
Помина времето кога се мислеше дека ревмата напаѓа само повозрасни луѓе. Ревматизмот е најчеста хронична болест во светски рамки. Од неа страда третина од светската популација. Болеста ги зафаќа коските, зглобовите, тетивите, мускулите и лигаментите. Главно ги напаѓа жените, поретка е кај мажите. Се јавува околу 30-тата година од животот, но ја има и кај помлади луѓе и кај деца.

Станува збор за заболување на мускулно-коскениот систем, автоимуна болест која предизвикува хронично воспаление на зглобовите. Во моментов ревматизмот се смета за една од најчестите и сериозни болести на човештвото. Болеста е хронична и прогресивна. Кога велиме хронична, тоа значи дека трае долго, но не значи дека тегобите се присутни цел период. Прогресивна е зошто болеста напредува и постои потенцијална опасност да ги уништи зглобовите или да ја ограничи нивната функција.

Симптоми
Најчестите симптоми се замор, намален апетит, лесно зголемена температура, болки во зглобовите и во мускулите, отеченост на зглобовите, утринска вкочанетост на зглобовите, нивна болна осетливост на допир. Мускулните болки, зглобните болки и вкочанетоста се најчести наутро и по периоди на неактивност. За време на активните периоди дури и едноставни движења стануваат тешко изводливи.
Артритисот е чест во период на влошување на болеста, кога зглобовите стануваат црвени, отечени, болни и осетливи на допир. Ова се случува заради тоа што синовиумот е воспален и засилено создава синовијална (зглобна) течност. Зглобовите се најчесто зафатени симетрично, односно се зафатени зглобови на двете страни од телото. Често се вклучени малите зглобови на рацете, на дланката, на стапалото. Хроничното воспаление може да ги зафати ткивата, коските и ‘рскавицата. Понекогаш се јавува и болка во грбот, која може да се шири накај нозете. Некогаш болката се чувствува само при движење или кога се менува времето.

Облици на ревматизам
Постојат повеќе од 200 познати видови ревматски односно мускулно-коскени заболувања. Најчест облик на артритис е остеоартритисот кој ги погодува вратот, колковите, колената и долниот дел од грбот. Болните чувствуваат слабост во мускулите, болки во грбот и здрвеност на зглобовите. За време на заболувањето на ревматидниот артритис имунолошкиот систем паѓа и тие клетки го напаѓаат ткивото околу зглобовите. Пациентите тогаш чувствуваат замор, треска и израсток околу зглобовите и нивна здрвеност. Познати се уште гихтот, лупусот и псоријазичниот артритис. Ревматските заболувања можат да бидат и толку тешки што може да предизвикаат деформации во коските и зглобовите и да се јави опасност болниот да остане неподвижен.

Дијагноза

Прв чекор кон поставување дијагноза е преглед од страна на лекар ревматолог. Тој ќе се распраша за симптомите, можно е да побара да се направат анализи на крвта и рендген-снимки. Дијагнозата се поставува врз основа на симптомите и тегобите, распоредот на зафатените зглобови и снимките.

Лекување
Ревматските болести се хронични и главно не можат да се излечат, но терапијата помага да се контролира текот на болеста и да се намалат симптомите. Со промена на животните навики некои од овие болести можат да се пресретнат и да се запре нивниот напредок. Оптималниот третман се состои од комбинација на лекови, одмор и вежби за зајакнување на зглобовите.
Ако болеста веќе се појавила, лекувањето е со лекарства и физикална терапија, но и хируршки, доколку тегобите не поминуваат. Во основа, правилниот пристап кон лекување е пред сѐ здрав начин на живот, исхрана и природна терапија со чаеви и препарати на основа на лековити билки. Овој пристап дава добри резултати. Кај лицата со големи болки неопходно се да се мирува, како и лекови кои смируваат болки, седативи за опуштање на мускулите. Често се применува и ставање инјекции на болните места.
Кај физикалната терапија се применуваат сите облици на процедури (електротерапија, термотерапија, хидротерапија, терапија со ултразвук, кинезитерапија и вежби), кои ги одредува лекар специјалист во зависност од тежината на состојбата.

Временски промени и ревма
Временските промени во смисла на промени на атмосферски притисок, влажност на воздухот, промена на температурата, влијаат на рецепторите за болка. Поради тоа, доаѓа до влошување на ревматските состојби, особено на болните симптоми.
Нема позната причина зошто некој добива ревма. Фамилијарната предиспозиција е честа, што значи дека генетскиот фактор може да игра улога во настанувањето на болеста.