До 12 декември се аплицира за субвенции за печки на пелети

Министерството за економија објави нов, втор оглас за доделување субвенции за печки на пелети.

– Со Ребалансот на буџетот, Министерството за економија побара и доби дополнителни средства во износ од 7.000.000 денари за субвенционирање печки на пелети за домаќинствата. Со ова ќе придонесеме за подигање на јавната свест, за заштеди на енергијата која е скап ресурс и за заштита на животната средина, чија загаденост во есенско-зимската сезона во последниве години создава големи потешкотии. Оваа мерка е и во согласност со владиниот План за чист воздух, рече министерот за економија Крешник Бектеши, додавајќи дека новиот оглас е објавен поради големиот интерес на граѓаните на првиот повик.

Посочи дека право на учество на овој оглас имаат граѓаните кои имаат купено печки на пелети во своите домови во периодот од 1 септември до 12 декември годинава и кои ќе поднесат барање за искористување на правото на надоместок.

– Од денеска до 12 декември сите домаќинства ќе имаат можност да аплицираат за да добијат субвенции за набавување  печки на пелети. Ќе имаат можност да бидат субвенционирани со до 50 отсто од сумата, но не со повеќе од 500 евра во денарска противвредност, појасни Бектеши.

Министерот за економија ги повика сите заинтересирани лица да аплицираат, посочувајќи дека при првиот повик субвенции добиле над 450 домаќинства, а со вториот повик ќе бидат субвенционирани над 230 домаќинства.

– Во рамки на програмата за намалување на загаденоста во Република Македонија ние како Влада сме целосно посветени за субвенционирање во наредниот период на над 20.000 домаќинства во Република Македонија што се однесува на печки на пелети, наведе Бектеши.

Посочи дека доделувањето на поддршката на домаќинствата е по принципот „прв дојден – прв услужен’’.

Со новиот предлог буџет за 2019 година се предвидени дополнителни средства за повикот што ќе биде објавен кон почетокот на новата година.

На новинарското прашање, коja е висината на сумата за субвенционирање за плин и за метан и од кога отприлика би стапила во сила, министерот одговори дека сумите ќе се одредуваат речиси како со останатите мерки за енергетска ефикасност, односно некаде околу 50 отсто од трошоците за поставување на такви уреди, изразувајќи уверување дека, следната година овој период, односно есента 2019 година, ќе биде објавен оглас со цел да им излезат во пресрет на граѓаните.

– Моментално ние работиме да се овозможат што повеќе средства за таа намена. Откако како Министерство ќе бидеме подготвени со сите подзаконски акти тогаш ние предвидуваме некаде над три милиони евра за таа мерка. Во образложението на законот е предвидедено дека секоја година ние ќе ги зголемуваме средствата за таа намена, објасни Бектеши.