Златан Ибрахимовиќ низ солзи на „Сан Сиро“ се прости од фудбалот
По последното коло од Серија А и средбата Милан – Верона, се случи нешто неочекувано, Златан Ибрахимовиќ (41) се прости од фудбалот.
Легендарниот шведски напаѓач не беше во составот на Милан на овој натпревар поради повреда на потколеницата со која долго време се мачеше, но беше на стадионот. Навивачите на Милан му посветија посебна кореографија нарекувајќи го бог, а по средбата шведскиот напаѓач со емотивно обраќање ги изненади сите и објави дека си заминува.
Прекрасна кариера која се протега повеќе од две децении
„Дојде моментот да се збогувам со фудбалот, а не од вас“, им порача Златан на навивачите на Милан во емотивното обраќање. „Би сакал да им се заблагодарам на моето семејство и моите роднини за трпението. Би сакал да му се заблагодарам на моето друго семејство, кои се мои соиграчи. Сакам да му се заблагодарам на тренерот и неговиот персонал за одговорноста што ми ја дадовте. Ме пречекавте отворено и цел живот ќе бидам миланец. Време е да се збогувам со фудбалот, но не со вас. Претешко е, премногу емоции има. Ќе се видиме ако имаме среќа. Форца Милан и ќе видиме ти подоцна“, рече Златан во солзи, а целиот стадион плачеше со него.
End of an era.
Thanks, Zlatan. 🤴🏼🇸🇪
🎥 @SerieA_EN pic.twitter.com/wnqj9d3n9i
— Fabrizio Romano (@FabrizioRomano) June 4, 2023
Ибрахимовиќ во два наврати играше за Милан пет и пол години, одигра 169 натпревари со 93 гола и освои две Скудета и Суперкупот на Италија. Кариерата на еден од најдобрите напаѓачи на модерната ера траеше повеќе од две децении. Започна во Малме, а потоа играше за Ајакс, Јуве, Интер, Барселона, Манчестер Јунајтед, ПСЖ и ЛА Галакси. Тој освои шампионски титули со Ајакс, Јувентус, Интер, Барса и ПСЖ. Со Јунајтед ја освои Лигата на Европа. Оваа сезона, поради проблеми со повредите, Ибрахимовиќ имаше само 144 минути на теренот во четири настапи, но стана и најстариот стрелец во историјата на Серија А со пеналот против Удинезе во март. Стана најстариот играч кој се појавил во квалификациите за ЕП. Натпреварот против Белгија беше и негов последен.