Зголемен бројот на термини за вакцинација против сезонски грип

 Од денеска се зголемува бројот на термини за вакцинација против сезонски грип, информира Министерството за здравство.

Со новите термини вакцинацијата почна денеска во 14 часот во Здравствен дом Скопје, односно се одвива во шест поликлиники на територија на Скопје и тоа во поликлиниките: Ѓорче Петров, Букурешт, Чаир, Бит Пазар, Ченто и Јане Сандански. Имунизацијата е со упатување од матичен лекар преку Мој термин во период од 14 до 19 часот.

-Мој термин утрово отвори 1.800 термини за Скопје за период од една недела, почнувајќи од денеска, петок, понеденик, вторник и среда, а попладнево ќе се пуштат уште дополнителни 1080 термини за деновите – сабота, четврток и петок. Во работните денови пунктовите за вакцинација работат до 19 часот, а во саботите од 8 до 14 часот, соопштија од Министерството.

Од таму наведуваат дека вакцинацијата е бесплатна за следните дефинирани ризични групи: стари лица над 65 години, лица со хронични заболувања, здравствени работници, бремени жени и децата на возраст од шест месеци до пет години.

Од Министерството појаснија дека дистрибуцијата по останатите градови е во тек и граѓаните дополнително ќе бидат информирани за отворените термини за вакцинација

Според препораките од страна на епидемиолозите нема период во кој може да се задоцни со вакцинацијата.

-Добро е секој граѓанин да ја прими вакцината во било кој период до започнување на пикот на сезоната на грип. Порано пикот на сезоната бил во декември и јануари, а сега со временските промени пикот го очекуваме при крајот на јануари и почеток на февруари. Во однос на ова, според епидемиолозите, никогаш не е доцна граѓаните да се заштитат од сезонскиот грип и да ја примат потребната вакцина, се посочува во соопштението.

Во период на пандемија со коронавирус, во која сите граѓани применуваат дополнителни заштитни мерки, од Министерството велат дека е најдобро да се следат препораките за соодветна вакцинација, односно оние кои се веќе спроведени во пунктовите за вакцинација низ државата – организација на временската разлика наместо на пет, на десет минути да се примаат граѓаните, со цел да се намали веројатноста на двојната зараза, како и другите дополнителни мерки за заштита на јавното здравје.

-Ова значи правилно, добро организирано, навремено спроведување на вакцинација против сезонскиот грип и воедно заштита на граѓанинот кој ја прима вакцината и од актуелниот коронавирус. Оваа сезона сеуште нема потврден случај за сезонски грип, се наведува во соопштението на Министерството за здравство.