Zgjedhje të parakohshme nëse për 10 ditë nuk ka marrëveshje për ndryshimet kushtetuese

Për disa ditë do të dihet nëse ekziston ambient për arritje të marrëveshjes me opozitën për shumicë prej dy të tretave e cila nevojitet për t’u votuar ndryshimet në Parlament, të cilat dalin nga Marrëveshja për emrin me Greqinë, tha dje kryeministri Zoran Zaev.

Ai në deklaratën dhënë pas orës solemne të studentëve të saporegjistruar në FSHIIK, paralajmëroi se prej sot fillojnë bisedimet me opozitën, në mënyrë që të duhet nëse ekziston mundësia për marrëveshje. Konsideron se ekziston kapacitet për mbajtje të zgjedhjeve të parakohshme të cilat janë, thotë, obsioni i fundit nëse nuk arrihet marrëveshje.

“Gjithsesi që ka kapacitet për zgjedhje. Ligji dhe Kushtetuta i parashohin hapat e ardhshëm. Por, shpresoj se do të arrijmë sukses të dakordohemi. Proceset nuk mund të jenë të ngrira dhe të qëndrojnë në vend, punët duhet të lëvizin përpara”, tha kryeministri.

Nëse nuk arrihet marrëveshje dhe shkohet në zgjedhje të parakohshme, sipas tij, zgjedhjet do të ndodhin shpejtë, ndërkaq si termin për organizimin e tyre e përmendi fundin e nëntorit. Ai përmendi se në tërë atë proces patjetër të mendohet në afatet, për shembull në zgjedhjet e Parlamentit Evropian të cilat do të mbahen në muajin maj të vitit të ardhshëm, ku do të merr pjesë edhe Greqia.

Zaev theksoi se në situatën e tanishme është reale që të gjithë të tregojnë pjekuri politike duke pasur parasysh atë që askush nuk ofron alternativë të NATO-s dhe BE-së, e as ndërkaq marrëveshje më të mirë nga ajo që është arritur me Greqinë.

Edhe zëvendëskryeministrja dhe ministre e Mbrojtjes, Radmilla Shekerinska, në konferencën e përbashkët për shtyp në Qeveri dje me zëvendëskryeminsitrin e angazhuar për Çështje Evropiane, Bujar Osmani paralajmëroi se në shtatë deri dhjetë ditët në vijim do të bëhen të gjitha konsultimet e nevojshme me deputetët dhe grupet e deputetvëe dhe do të vlerësohet nëse ekzistojnë gjasa për t’u siguruar shumica prej dy të tretave.

“Nëse ekzistojnë, konsiderojmë se Maqedonia realisht do të fitojë mundësinë që në procedurë të shpejtë dhe efikase t’i përfundojë obligimet e veta, të sigurojë anëtarësim në NATO dhe fillim të negociatave me BE-në. Nëse ko, duhet tëa prëdorim veglën e dytë demokratike, e ajo është organizimi i zgjedhjeve të parakohshme parlamentare”, sqaroi Shekerinska.

Dy zëvendëskryeministrat dërguan porosi se tani është koha kur Maqedonisë i nevojitet unitet më shumë se kurdo herë dhe kur deputetët nuk duhet të sjellin vendim partiak, por personal nëse dëshirojnë në BE dhe NATO apo dëshirojnë izolim.

“Kjo është koha kur Maqedonisë i nevojitet uniteti më shumë se kurdo herë. Deputetët në Kuvendin e Republikës së Maqedonisë do të kenë zgjedhje të qartë – nga njëra anë Maqedoni në NATO dhe BE, ndërsa ana tjetër është izolim dhe pasiguri. Deputetët presim ta pranojnë porosinë nga referendumi, ta ndërmarrin përgjegjësinë e vet dhe ta bëjnë Maqedoninë vend në të cilin qytetarët do të kenë mundësi më të mira për jetë”, tha Shekerinska, duke shtuar se në të ardhmen e afërt Maqedonia nuk do të ketë një mundësi të këtillë.

Kryetari i VMRO-DPMNE-së, Hristian Mickovski, ndërkaq, mbrëmë, në emisionin “Hapur” në TV Alfa deklaroi se grupi i deputetëve është monolit dhe mbetet në qëndrimin se Marrëveshja nuk mori legjitimitet në referendum dhe se procesi rreth marrëveshjes pas referendumit ka përfunduar.

Për zgjedhje të parakohshme thotë se VMRO-DPMNE është e gatshme, por duhet paraprakisht të përfundohen aktivitete të caktuara për t’u ardhur deri te zgjedhjet e parakohshme, e ato janë 100 ditë përpara të ketë qeveri sipas Modelit të Përzhinos.

“Zaev do të tentojë ta kapërcejë atë, të interpretojnë dispozita kushtetuese ligjore për zgjedhje të shpejta mes 45 dhe 60 ditëve, por nuk mund ta shmangë Modelin e Përzhinos për përbërje të qeverisë”, thotë Mickoski dhe theksoi se VMRO-DPMNE do të insistojë në respektim të asaj që është arritur.

Ai i përsëriti akuzat se janë vjedhur 50 mijëp vota në referendum, siç tha, në mënyrë të dhunshme dhe devijante janë mbushur  kutitë. Do të pranojë, tha, zgjedhje të parakohshme parlamentare vetëm nëse Prokurori publik jep dorëheqje dhe formohet Komision anketues për parregullsi në referendum.

Departamenti amerikan i Shtetit pas referendumit kumtoi se SHBA-ja i përshëndetë rezultatet  nga votimi në referendumin në Maqedoni, në të cilin qytetarët shprehën mbështetje për anëtarësim në NATO dhe BE me pranimin e Marrëveshjes së Prespës mes Maqedonisë dhe Greqisë.

“SHBA-ja e mbështetë fuqishëm implementimin e plotë të Marrëveshjes së Prespës, e cila i mundëson Maqedonisë ta marrë vendin e merituar në NATO dhe BE, dhe do të kontribuojë drejt stabilitetit rajonal, sigurisë dhe prosperitetit. Duke pasur parasysh atë që Parlamenti i Maqedonisë tani fillon me shqyrtimin e ndryshimeve kushtetuese, u bëjmë thirrje liderëve të ngriten mbi politikat partiake dhe ta shfrytëzojnë këtë mundësi historike për të sigururar të ardhme më të ndritshme për vendin si anëtare e barabartë e institucioneve perëndimore”, ceket në kumtesën e DASH-it, pas mbajtjes së referendumit në Maqedoni.

Edhe përfaqësuesja e lartë e BE-së për politikë të jashtme dhe siguri, Federika Mogerini dhe eurokomisari për zgjerim, Johanes Han, në deklaratë të përbashkët, pas referendumit porositën se shumica e madhe  e qytetarëve e mbështetën marrëveshjen me Greqinë dhe se tani tadhën e ka Parlamenti.